Qashqadaryo viloyati Dehqonobod tumani hokimligi

Dehqonobod tumanida Qashqadaryo viloyat Sog‘liqni saqlash boshqarmasi tomonidan tashkil etilgan sayyor qabul jarayoni hozirda faol davom etmoqda. Tadbirda viloyatdagi davolash-profilaktika muassasalarining rahbarlari, yetakchi mutaxassis shifokorlar, Dehqonobod tuman tibbiyot birlashmasi xodimlari hamda boshqa mas’ullar ishtirok etmoqda. Jarayon davom etayotgani bois qabulga tashrif buyurayotgan fuqarolar soni ham ortib bormoqda. Sayyor qabul — muhtaram Prezidentimiz boshchiligida tibbiyot sohasida amalga oshirilayotgan keng qamrovli islohotlarning amaliy ifodasidir. Ushbu islohotlar natijasida olis hududlar aholisi endi viloyat markazi yoki poytaxtga borib ovora bo‘lmasdan, o‘z yashash hududida malakali shifokorlar ko‘rigidan o‘tish, zarur tibbiy maslahat va yo‘llanmalarni olish imkoniyatiga ega bo‘lmoqda. Bu esa aholining tibbiy xizmatlardan foydalanish qulayligi va sifatini yanada oshirmoqda. Qabul davomida fuqarolarning tibbiy ko‘rikka oid murojaatlari birinchi navbatda ko‘rib chiqilmoqda. Tajribali shifokorlar tomonidan zarur tekshiruvlar o‘tkazilib, zaruratga ko‘ra tuman, viloyat va respublika miqyosidagi ixtisoslashtirilgan tibbiyot muassasalariga yo‘llanmalar berilmoqda. Shuningdek, ishga joylashish, mehnatga doir huquqlar, nogironlik nafaqasiga chiqish kabi boshqa ijtimoiy masalalar yuzasidan bildirayotgan murojaatlar ham ro‘yxatga olinib, mas’ullarga ularni hal etish bo‘yicha tegishli topshiriqlar berilmoqda. Sayyor qabul davom etmoqda. Kanalga ulanish: @Dehqonobodpress