Xalq deputatlari Dang‘ara tuman Kengashining VII chaqiriq 29-sessiyasi bo‘lib o‘tdi
2026-10-21 15:00:00 / Yangiliklar
Xalq deputatlari Dang‘ara tuman Kengashining VII chaqiriq 29-sessiyasi bo‘lib o‘tdi
Sessiya ishida tuman Kengashi deputatlari, tuman hokimining tegishli o‘rinbosarlari, kun tartibiga kiritilgan masalalarga daxldor tashkilotlar rahbarlari hamda ommaviy axborot vositalari vakillari ishtirok etdilar.
Sessiyani Xalq deputatlari Dang‘ara tumani Kengashi raisi Dadaboyev Qayumjon Qodirovich ochdi va olib bordi.
Dastlab, tuman prokurori Boboxonov Akmaljon G‘opporovich tomonidan 2026 yilning 9 oyi davomida jinoyatchilikka va korrupsiyaga qarshi kurashish borasida amalga oshirilgan ishlar yuzasidan axborot berildi.
Shuningdek, tuman IIB boshlig‘i Bozorboyev Jahongir Hayotjonovich huquqbuzarliklarning oldini olish, ularning profilaktikasi, korrupsiyaga qarshi kurashish hamda jamoat xavfsizligini ta’minlash borasida amalga oshirilgan ishlar haqida ma’lumot taqdim etdi.
Sessiyada tuman hokimi birinchi o‘rinbosari Usmonov Iqboljon Baxtiyorovich tomonidan tuman mahalliy budjetining 2026 yilda shakllangan qo‘shimcha manbalari hisobidan mablag‘larni yo‘naltirish masalasi hamda O‘zbekiston Respublikasi Prezidentining 2026 yil 11 sentabrdagi PF-193-son Farmoni ijrosi yuzasidan tumanda amalga oshirilayotgan ishlar muhokama qilindi.
Shu bilan birga, O‘zbekiston Respublikasi Prezidentining Dang‘ara tumanidagi Xalq qabulxonasining 2026 yil 9 oylik faoliyati yakunlari, aholining ijtimoiy ehtiyojmand toifalarini 2027 yilda ishga joylashtirish uchun ish o‘rinlarining eng kam sonini belgilash va ularni zaxiraga qo‘yish masalalari ko‘rib chiqildi.
Bundan tashqari, mahallalarning ijtimoiy-iqtisodiy muammolarini hal etish jamg‘armasi daromadlari va xarajatlari ijrosi, suv resurslaridan samarali foydalanish, sug‘orish tarmoqlarida suvni tejash texnologiyalarini kengaytirish hamda «Suv yetkazib berish xizmati» davlat muassasasining 2026 yilgi vegetatsiya davri hisoboti yuzasidan fikr almashildi.
Muhokamalar jarayonida deputatlar tomonidan masalalar yuzasidan fikr va takliflar bildirilib, mavjud muammolarni bartaraf etish hamda belgilangan vazifalar ijrosini ta’minlash bo‘yicha tegishli chora-tadbirlar belgilab olindi.
Sessiya yakunida kun tartibidagi masalalar yuzasidan tegishli qarorlar qabul qilinib, ularning ijrosini ta’minlash mas’ul tashkilot va idoralar zimmasiga yuklatildi.