Dang‘ara tumani hokimligida Xalq deputatlari Dang‘ara tuman Kengashining VII chaqiriq 26-sessiyasi bo‘lib o‘tdi.
2026-07-10 11:00:00 / Yangiliklar
Dang‘ara tumani hokimligida Xalq deputatlari Dang‘ara tuman Kengashining VII chaqiriq 26-sessiyasi bo‘lib o‘tdi.
Sessiya ishida tuman Kengashi deputatlari, tuman hokimining o‘rinbosarlari, kun tartibiga kiritilgan masalalarga daxldor tashkilot va idoralar rahbarlari hamda ommaviy axborot vositalari vakillari ishtirok etdilar.
Sessiyani Xalq deputatlari Dang‘ara tuman Kengashi raisi Dadaboyev Qayumjon Qodirovich ochib, olib bordi.
Sessiya kun tartibiga muvofiq bir qator muhim masalalar ko‘rib chiqildi.
Jumladan, tuman prokurori Boboxonov Akmaljon G‘opporovich tomonidan 2026 yilning birinchi yarim yilligida jinoyatchilik va korrupsiyaga qarshi kurashish borasida amalga oshirilgan ishlar yuzasidan axborot berildi.
Shuningdek, tuman Ichki ishlar bo‘limi boshlig‘i Bozorboyev Jahongir Hayotjonovichning joriy yilning olti oyi davomida huquqbuzarliklarning oldini olish va profilaktikasi, korrupsiyaga qarshi kurashish hamda jamoat xavfsizligini ta’minlash borasida amalga oshirilgan ishlar to‘g‘risidagi hisoboti eshitildi.
Kun tartibidagi navbatdagi masala bo‘yicha tuman Iqtisodiyot va moliya bo‘limi boshlig‘ining birinchi o‘rinbosari Latipov Qozimjon Hakimjonovich budjet mablag‘lari tejalishi natijasida bo‘shab qolgan qo‘shimcha mablag‘lardan foydalanish hamda "Infratuzilma va ijtimoiy barqarorlik" jamg‘armasi mablag‘larini maqsadli yo‘naltirish yuzasidan ma’lumot berdi.
Shuningdek, tuman hokimining o‘rinbosari O‘rinova Shahnozaxon Egamberdiyevna tomonidan yoshlarning yozgi ta’til davrini mazmunli, samarali va xavfsiz tashkil etish, ularning bo‘sh vaqtlarini foydali mashg‘ulotlarga jalb qilish hamda iqtidor va qobiliyatlarini ro‘yobga chiqarishga qaratilgan "Dolzarb 90 kun" chora-tadbirlar dasturini tasdiqlash to‘g‘risida hisobot taqdim etildi.
Shu bilan birga, tuman Kengashi kotibiyati mudiri Ergashev Ikromjon Mahmudjonovich Xalq deputatlari Dang‘ara tuman Kengashi doimiy komissiyalari tarkibiga hamda Kengash huzuridagi Xalqparvar komissiyasi tarkibiga o‘zgartirish kiritish to‘g‘risida axborot berdi.
Shuningdek, sessiyada Dang‘ara tuman Obodonlashtirish boshqarmasi boshlig‘i Xolmirzayev Marufjon Kamolovichning tuman markaziy ko‘chalari bo‘yidagi yuridik shaxslar va yakka tartibdagi tadbirkorlarga shartnoma asosida qattiq maishiy chiqindilarni olib chiqish hamda hududlarni obodonlashtirish xizmatlarini ko‘rsatish bo‘yicha to‘lov tariflarini tasdiqlash haqidagi axboroti ham eshitildi.
Navbatdagi masala yuzasidan Dang‘ara tuman Yoshlar ishlari agentligi bo‘limi boshlig‘i Xidirov Lazizjon Aliqo‘ziyevich tomonidan "Yoshlar daftari" jamg‘armasi mablag‘lari hisobidan yoshlarni qo‘llab-quvvatlash maqsadida mablag‘ ajratish to‘g‘risida axborot taqdim etildi.
Kun tartibidagi barcha masalalar deputatlar tomonidan atroflicha muhokama qilinib, ular yuzasidan tegishli qarorlar qabul qilindi. Sessiya yakunida mas’ullarga belgilangan vazifalarning o‘z vaqtida va sifatli ijrosini ta’minlash bo‘yicha aniq topshiriqlar berildi.