ҚИШЛОҚ ХЎЖАЛИГИ ЕРЛАРИНИ АУКЦИОН ОРҚАЛИ АЖРАТИШДА ЯНГИ БОСҚИЧ
2026-07-13 09:30:00 / Yangiliklar
ҚИШЛОҚ ХЎЖАЛИГИ ЕРЛАРИНИ АУКЦИОН ОРҚАЛИ АЖРАТИШДА ЯНГИ БОСҚИЧ
Ўзбекистон Республикаси Президентининг 2026 йил 24 апрелда «Қишлоқ хўжалиги ишлаб чиқарувчиларининг ердан фойдаланишдаги мустақиллигини таъминлашга қаратилган навбатдаги чора-тадбирлар тўғрисида»ги ПФ-68-сон Фармони қишлоқ хўжалиги ерларини ажратиш тизимини янада такомиллаштиришга хизмат қилади.
Фармонга мувофиқ, 2026 йил 1 майдан бошлаб республикадаги барча қишлоқ хўжалигига мўлжалланган ер участкалари электрон онлайн аукцион орқали ягона тартибда ижарага берилади. Бу ер ажратиш жараёнида очиқлик, рақобат ва тенг имкониятларни таъминлайди.
Янги тартибга кўра, аввал сотилмай қолган 3,7 минг гектар ер майдонлари ҳам қайта аукционга чиқарилади. Аукционда ер участкаларининг бошланғич нархи норматив қийматининг 50 фоизи миқдорида белгиланиб, ҳар бир такрорий савдода сотилмаган лот нархи 10 фоиздан босқичма-босқич бошланғич нархнинг 10 фоизи миқдорига (ер участкасини аукцион савдоларига чиқариш харажатларидан кам бўлмаган миқдорига) қадар пасайтирилади. Шунингдек, биринчи аукцион 15 кун ичида, такрорий савдолар эса бир кун муддатда ўтказилиши белгиланди.
Фармон билан туман ва шаҳар ҳокимликлари тасарруфидаги бўш ерларни ўз вақтида аукционга чиқариш бўйича аниқ механизм жорий этилди. Белгиланган муддатда савдога қўйилмаган ер участкалари автоматик тарзда электрон аукционга чиқарилади.
Ушбу ислоҳотлар ердан самарали фойдаланиш, инвестицияларни жалб этиш, юқори қўшилган қийматга эга маҳсулотлар етиштириш ҳамда қишлоқ хўжалигида шаффоф ва адолатли муносабатларни қарор топтиришга хизмат қилади.