Namangan viloyati Chortoq tumani hokimligi

Bu yil Chortoq tumanida 2800 nafar o‘quvchi yoshlar umumta’lim maktablarini bitirmoqda. Ularning 286 nafari muddatidan avval oliy ta’lim muassasalariga o‘qishga qabul qilingan bo‘lsa, 45 nafariga oltin, 8 nafariga kumush medallar berish tavsiya etildi. 5-sonli davlat ixtisoslashtirilgan maktab-internatida tashkillangan tadbir davlat madhiyasi bilan boshlandi. Prezidentimizning maktab bitiruvchilariga tabrigi o‘qib eshittirildi. Tuman hokimi Ilhomjon Sattarov yurtimizda ta’lim sohasida olib borilayotgan keng ko‘lamli islohotlar mazmun-mohiyati haqida to‘xtaldi. Bitiruvchilarni qizg‘in tabriklab, oq yo‘l tiladi. Mazkur bilim dargohining sobiq o‘quvchisi sifatida ustozlarga minnatdorlik bildirdi. Taqdirlash marosimi bir guruh ilg‘or ustozlar va bitiruvchilarga quvonch onlarini hadya etdi. Ushbu ta’lim dargohini bu yil 105 nafar o‘quvchi bitirmoqda. Ularning 105 nafari muddatidan oldin talaba bo‘ldi. 10 nafari nufuzli oliy ta’lim muassasalari grantiga sazovor bo‘ldi.