Namangan viloyati hokimi Shavkatjon Abdurazzoqov bugun Chortoq tumanida bo‘lib, amalga oshirilayotgan qurilish-bunyodkorlik ishlari va muhim loyihalar bilan tanishdi.
2025-12-23 14:45:00 / Yangiliklar
Bugungi kunda tumanda zamonaviy infratuzilma yaratish va hududlarni kompleks rivojlantirish ishlari jadal surʼatlarda olib borilmoqda.
Xususan, "Katta Namangan" kanalining Bobur massivigacha bo‘lgan qismida betonlash ishlari bosqichma-bosqich davom etyapti.
Shu bilan birga, Furqat nomli madaniyat va istirohat bog‘ini rekonstruksiya qilish jarayonida bog‘ning umumiy infratuzilmasi zamon talablariga mos ravishda yangilanib, zamonaviy arxitektura yechimlari, aholi uchun qulay shart-sharoitlar, yoritish va yashil hudud tizimlari bosqichma-bosqich barpo etilmoqda.
Shuningdek, “Chortoq soyining Beshkapa mahallasi hududidan Namangan mahallasigacha bo‘lgan 1,5 kilometr qismini kaskadlash” hamda soy bo‘ylab ekoyo‘lak qurish loyihalari asosida qurilish-montaj va hududni obodonlashtirish ishlari belgilangan dastur doirasida jadal surʼatlarda amalga oshirilmoqda.
Viloyat rahbari joylardagi qurilish surʼatlari va ish sifatini atroflicha o‘rganib, masʼullarga ishlarni sifat va meʼyor talablari darajasida davom ettirish bo‘yicha aniq ko‘rsatmalar berdi.
Bugungi kunda tuman markazida o‘rnatilgan "Yangi yil archasi" bayramning asosiy ramziga aylanib, aholi va mehmonlarga ko‘tarinki kayfiyat ulashmoqda.
Viloyat hokimi o‘rganishlari doirasida mazkur hududda ham bo‘lib, aholi uchun qulay, xavfsiz va madaniy hordiq chiqarishga mos muhit yaratish, bayram kunlarida favqulodda vaziyatlar guruhlari shayligi, jamoat tartibi va xavfsizlikni taʼminlash bo‘yicha masʼullarga topshiriqlar berdi.
