Toshkent viloyati Chirchiq shahar hokimligi

Toshkent xalqaro investitsiya forumi doirasida Xitoy kompaniyalari bilan hamkorlik memorandumlari imzolandi

Joriy yilning 16–18-iyun kunlari Toshkent shahrida 5-Toshkent xalqaro investitsiya forumi (TIIF-2026) bo‘lib o‘tmoqda.
Forumning asosiy maqsadi investitsiyalarni jalb etish, yangi hamkorlik aloqalarini yo‘lga qo‘yish va mamlakatimizning investitsiyaviy salohiyatini namoyish etishdan iborat.
 

Forum doirasida yalpi majlislar, investitsiya va biznesga oid panel sessiyalar, B2B hamda B2G uchrashuvlari, shuningdek, energetika, sanoat, infratuzilma, logistika va raqamli iqtisodiyotga bag‘ishlangan muhokamalar tashkil etilmoqda.

Xususan, “Toshkent traktor zavodi” MCHJning bir qator xorijiy hamkorlari ham mazkur nufuzli xalqaro forumda ishtirok etmoqda. Jumladan, 16-iyun kuni Xitoyning CHINA RAILWAY CONSTRUCTION HEAVY INDUSTRY XINJIANG CO., LTD kompaniyasi vakillari forum doirasida o‘tkazilgan uchrashuvlarda qatnashib, O‘zbekistonda investitsiyaviy muhitni yanada rivojlantirish, xorijiy investorlar uchun qulay shart-sharoitlar yaratish hamda iqtisodiyotning ustuvor tarmoqlariga to‘g‘ridan to‘g‘ri investitsiyalarni jalb etish masalalari yuzasidan fikr almashdilar.

Shundan so‘ng kompaniya vakillari “Toshkent traktor zavodi” MCHJga tashrif buyurib, korxonaning ishlab chiqarish quvvatlari va istiqbolli loyihalari bilan yaqindan tanishdilar. Tashrif davomida hamkorlik aloqalarini yanada kengaytirish, ishlab chiqarishni mahalliylashtirish dasturlarini birgalikda amalga oshirish hamda investitsiyaviy loyihalarni rivojlantirishga qaratilgan ikki tomonlama memorandum imzolandi.
 

Shuningdek, Xitoyning yetakchi qishloq xo‘jaligi texnikalari ishlab chiqaruvchilaridan biri bo‘lgan MODERN AGRICULTURAL EQUIPMENT CO., LTD kompaniyasi vakillari ham 5-Toshkent xalqaro investitsiya forumida ishtirok etish maqsadida mamlakatimizga tashrif buyurdilar.

Kompaniya vakillarining ma’lum qilishicha, MODERN AGRICULTURAL EQUIPMENT CO., LTD 2001-yilda Xitoy qishloq xo‘jaligini mexanizatsiyalashtirish fanlari akademiyasi — Chinese Academy of Agricultural Mechanization Sciences Group Co., Ltd. (CAAMS) qoshida tashkil etilgan.
 

Uchrashuvlar davomida kompaniya vakillari O‘zbekiston qishloq xo‘jaligi sohasida amalga oshirilayotgan islohotlarni yuqori baholab, zamonaviy texnikalarni yetkazib berish, ularni mahalliylashtirish, servis xizmatlarini rivojlantirish hamda qo‘shma investitsiyaviy loyihalarni amalga oshirish bo‘yicha hamkorlik istiqbollariga alohida qiziqish bildirdilar.

Muloqotlar yakunida tomonlar o‘rtasida o‘zaro manfaatli hamkorlikni rivojlantirish va qo‘shma loyihalarni amalga oshirish yuzasidan ikki tomonlama memorandum imzolandi.
Ma’lumot uchun, mazkur kompaniya bilan paxta terish mashinalarini ishlab chiqarishni yo‘lga qo‘yish bo‘yicha umumiy qiymati 4,46 million AQSH dollariga teng investitsiyaviy loyiha amalga oshirilmoqda.