Turkiston viloyati delegatsiyasi Chirchiqdagi zamonaviy sanoat korxonalari faoliyati bilan tanishdi
2026-05-30 18:00:00 / Yangiliklar
Turkiston viloyati delegatsiyasi Chirchiqdagi zamonaviy sanoat korxonalari faoliyati bilan tanishdi
Chirchiq shahriga Qozog‘iston Respublikasining Turkiston viloyati Sanoat va industrial-innovatsion rivojlanish boshqarmasi rahbari N.Isayev, Maktaaral tumani hokimi N.Sattarov hamda bir guruh tadbirkorlardan iborat delegatsiya tashrif buyurdi.
Tashrif doirasida mehmonlar shahardagi yirik sanoat korxonalarining ishlab chiqarish salohiyati va faoliyati bilan yaqindan tanishdilar.
Xususan, delegatsiya a’zolari “Agrotech” klasteri, “Uztex Group” hamda “Sharq Tubes” korxonalarida bo‘lib, ishlab chiqarish jarayonlari, zamonaviy texnologiyalar, mahsulotlar assortimenti hamda korxonalarning eksport salohiyati bilan tanishdilar.
Shuningdek, uchrashuvlar davomida sanoat kooperatsiyasini rivojlantirish, investitsiyaviy hamkorlikni kengaytirish va tadbirkorlik aloqalarini mustahkamlash masalalari yuzasidan fikr almashildi.
Mazkur tashrif ikki hudud o‘rtasidagi savdo-iqtisodiy hamkorlikni yanada rivojlantirish, yangi loyihalarni amalga oshirish hamda o‘zaro tajriba almashish uchun muhim ahamiyat kasb etadi.
Delegatsiyaga Chirchiq shahar hokimi M.Abdurahimov hamrohlik qildi.