Toşkent viloyati Çirçiq şahar hokimligi

Chirchiqda xotin-qizlar va bolalar huquqlarini himoya qilish borasidagi ishlar o‘rganildi

O‘zbekiston Respublikasi Prezidentining 2026-yil 3-martdagi “Ayollar va bolalar huquqlarini himoya qilishni kuchaytirish hamda ularga nisbatan tazyiq va zo‘ravonlik holatlarining oldini olish bo‘yicha qo‘shimcha tashkiliy-huquqiy chora-tadbirlar to‘g‘risida”gi PF–33-son Farmoni ijrosi doirasida Chirchiq shahridagi Oila va xotin-qizlar maskanida amalga oshirilayotgan ishlar o‘rganildi.

Mazkur tashrif ayollar va bolalar huquqlarini ishonchli ta’minlash, ularni har qanday tazyiq va zo‘ravonlikdan himoya qilish, shuningdek, jamiyatda bunday holatlarga nisbatan murosasizlik muhitini shakllantirish maqsadida tashkil etildi.

Tashrif davomida O‘zbekiston Respublikasi Oila va xotin-qizlar qo‘mitasi raisi o‘rinbosari U.Abdullayeva, Toshkent viloyati hokimi o‘rinbosari, Oila va xotin-qizlar boshqarmasi boshlig‘i N.Normirzayeva Chirchiq shahridagi Oila va xotin-qizlar maskanida yo‘lga qo‘yilgan faoliyat bilan yaqindan tanishdi.

Xususan, nikohlanuvchilarni “Maishiy zo‘ravonliksiz — baxtli hayot sari” maxsus o‘quv kurslarida o‘qitish, xotin-qizlar va bolalarning huquq hamda manfaatlarini himoya qilishni kuchaytirish, ularga nisbatan tazyiq va zo‘ravonlik holatlarining oldini olish, shuningdek, nizoli, notinch va ajrim yoqasidagi oilalar bilan ishlash borasida amalga oshirilayotgan ishlar ko‘zdan kechirildi.

Shuningdek, erta nikoh va 16 yoshgacha bo‘lgan homiladorlik holatlarining oldini olish, oilalarda sog‘lom ijtimoiy-ma’naviy muhitni shakllantirish, fuqarolar bilan manzilli ishlash va muammoli holatlarni barvaqt aniqlash yuzasidan olib borilayotgan chora-tadbirlar ham atroflicha muhokama qilindi.

Tashrif yakunida mas’ullar tomonidan mazkur yo‘nalishdagi ishlar samaradorligini yanada oshirish, amaliy mexanizmlarni kuchaytirish hamda profilaktik faoliyatni tizimli yo‘lga qo‘yish bo‘yicha tegishli tavsiyalar berildi.