“Bir nuroniy - o‘n yoshga mas’ul” ko‘rik-tanlovining Buxoro tuman bosqichi o‘tkazildi.
2025-07-29 00:00:00 / Yangiliklar
Mamlakatimizda keksa avlod vakillarini davlat tomonidan qo‘llab-quvvatlash, ularning ijtimoiy faolligini oshirish borasida qator chora-tadbirlar amalga oshirilmoqda.
Katta hayotiy tajribaga ega otaxon va onaxonlarimiz “Bir nuroniy – o‘n nafar yoshga mas’ul” tamoyili asosida o‘zlari istiqomat qilayotgan mahallada ish yuritib, tarbiyasi og‘ir, ma’naviy ko‘makka muhtoj, uyushmagan, ishsiz yoshlarga biriktirilib, ularning muammolarini bevosita hal etishga yordam berib kelmoqda. Shu orqali nuroniylarimiz yoshlarni Vatanga sadoqat, milliy qadriyatlarga hurmat, mamlakatda oshirilayotgan islohotlarga daxldorlik, diniy bag‘rikenglik va millatlararo totuvlik ruhida tarbiyalanishiga va jamiyatda o‘z o‘rnini topishiga hissa qo‘shmoqda.
Ana shunday fidoyi nuroniylar ishtirokida mamlakatimiz bo‘ylab “Bir nuroniy - o‘n yoshga mas’ul” shiori ostida ko‘rik-tanlovlar o‘tkazilmoqda.
Jumladan bugun 29-iyul kuni Buxoro tumani madaniya uyi binosida mazkur ko‘rik-tanlovning tuman bosqichi bo‘lib o‘tdi.
Tanlovning asosiy maqsadi har bir mahallalarda “Bir nuroniy – o‘n yoshga mas’ul” loyihasi asosida yoshlarga biriktirilgan nuroniylarni jamiyat hayotiga faol jalb qilish, ularning ijtimoiy faolligini oshirish, yoshlarimiz tarbiyasida keksa avlod vakilllarining tajribasidan foydalanish, jinoyatchilik va huquqbuzarliklarni oldini olish, ajrim yoqasida turgan yosh oilalar o‘rtasida barqaror muhitni vujudga keltirish borasida amalga oshirilayotgan ishlarni targ‘ib qilish va ijrosini ta’minlashda faol ishtirok etayotgan ijtimoiy faol nuroniylarni rag‘batlantirish hisoblanadi.
Buxoro tumani mahalla va nuroniylarni qo‘llab-quvvatlash bo‘limi, Yoshlar ishlari agentligi tuman bo‘limi, Respublika Ma’naviyat va ma’rifat markazi tuman bo‘linmasi hamda tuman Nuroniylar jamoatchilik Kengashi hamkorligida tashkil etilgan tanlovda har bir mahalladan faol nuroniylar 3 ta tanishtiruv, “Yoshlar – bizning kelajagimiz” hamda “Nuroniylar bellashuvi” shartlari asosida bellashdilar.
Buxoro tumani hokimligi axborot xizmati