Joriy yilning 12–19-iyun kunlari Buxoro tumani hokimi Anvarjon Ochilov boshchiligidagi delegatsiya Xitoy Xalq Respublikasiga rasmiy tashrif bilan borgan edi. Tashrifdan asosiy maqsad – investitsiyalar jalb qilish, zamonaviy texnologiyalarni tatbiq etish va yangi ish o‘rinlari yaratish edi.

Delegatsiya doirasida xitoylik yirik kompaniyalar bilan uchrashuvlar o‘tkazilib, hududlararo savdo aloqalari va sarmoyaviy hamkorlikni kuchaytirish, qishloq xo‘jaligi hamda sanoat sohalarida teng manfaatli loyihalarni amalga oshirish bo‘yicha muhim kelishuvlarga erishildi.

Aynan ushbu kelishuvlarning amaliy bosqichga o‘tishi sifatida, Xitoy Xalq Respublikasining Shinjon-Urumchi provinsiyasida faoliyat yurituvchi “SHANGHAI AIZE SUPPLY CHAIN MANAGEMENT CO., LTD” kompaniyasi rahbari janob Vang Shi boshchiligidagi delegatsiya yaqinda Buxoro tumaniga tashrif buyurdi.

Xitoylik investorlar bilan o‘zlashtirilmagan cho‘l hududlarida intensiv usulda bog’lar tashkil qilish dastlabki kelishuvga erishildi.

Tuman rahbari mehmonlar bilan muloqot davomida yurtimizda investorlar uchun yaratilgan imkoniyatlar, tumanimizning ishlab chiqarish salohiyati inobatga olgan holda biznes uchun qulay tuman ekanligini ta’kidladi.

Bu tashrif ikki tomonlama manfaatli hamkorlik uchun mustahkam zamin yaratdi. Endilikda xorijiy investorlar bilan birgalikda tumanda zamonaviy, yuqori texnologik agroklasterlarni yo‘lga qo‘yish ko‘zda tutilmoqda. Bunday xalqaro tashabbuslar nafaqat tuman iqtisodiyotini rivojlantirish, balki yangi ish o‘rinlari yaratish va aholining farovonligini oshirishga xizmat qiladi.