Buxoro viloyati Buxoro tumani hokimligi

Buxoro tumanining Yangi turmush mahallasida yashovchi fuqaro Tilav Saidov xonadonida bo‘lib, uning ko‘chat yetishtirish borasidagi faoliyati bilan tanishdik.

Tilav Saidov xonadonida hamda dehqon xo‘jaligi uchun ajratilgan 15 sotix yer maydonida manzarali va mevali daraxt ko‘chatlarini yetishtirish bilan shug‘ullanmoqda. U hududning tuproq-iqlim sharoitiga mos bo‘lgan daraxt va buta ko‘chatlarini ko‘paytirishga alohida e’tibor qaratmoqda.

Ayni paytda uning ko‘chatxonasida klyon, katalpa, yapon sakurasi, shoyi akatsiya, yasin, aylant, amorfa kabi manzarali daraxt va buta ko‘chatlari yetishtirilmoqda.

Ko‘chat yetishtirish jarayonida ularning hudud sharoitiga moslashuvi, parvarishi va sifatli rivojlanishiga alohida e’tibor qaratilmoqda. Bu esa kelgusida mahallalar, aholi xonadonlari va boshqa hududlarni ko‘kalamzorlashtirish uchun sifatli ko‘chatlar yetkazib berish imkonini bermoqda.

Tilav Saidov “Yashil makon” umummilliy loyihasining kuzgi mavsumida ham faol ishtirok etishni maqsad qilgan. Shu maqsadda 300 ming dona manzarali va mevali daraxt ko‘chati tayyorlab qo‘yilgan.

“Yashil makon” umummilliy loyihasi doirasida hududlarning yashillik darajasini oshirish, daraxt va butalarni ko‘paytirish, atrof-muhitni obodonlashtirish hamda ekologik muhitni yaxshilashga qaratilgan ishlar izchil davom ettirilmoqda.

Yangi turmush mahallasida yo‘lga qo‘yilgan ushbu faoliyat yer maydonlaridan samarali foydalanish, ko‘chat yetishtirishni rivojlantirish va aholi uchun qo‘shimcha daromad manbalarini yaratish borasidagi amaliy tashabbuslardan biridir.

Bugun parvarish qilinayotgan har bir ko‘chat ertangi kunning yanada yashil va obod hududlarini yaratishga xizmat qiladi. Tilav Saidov tomonidan tayyorlangan 300 ming dona ko‘chat esa “Yashil makon” umummilliy loyihasining kuzgi mavsumida hududlarni ko‘kalamzorlashtirish ishlariga munosib hissa bo‘lib qo‘shiladi.