Buxoro viloyati Buxoro tumani hokimligi

Buxoro tumanining Talaliyon mahallasi Suvchiqar qishlog‘ida Mustaqillik bayrami arafasida yana bir muhim ijtimoiy obyekt — zamonaviy maktabgacha ta’lim tashkiloti foydalanishga topshirildi.

Yangi 49-sonli davlat maktabgacha ta’lim tashkilotining foydalanishga topshirilishi mahalla ahli, ayniqsa, yosh oilalar va farzandlari maktabgacha ta’lim yoshida bo‘lgan ota-onalar uchun quvonchli voqea bo‘ldi.

Muassasaning ochilish marosimida tuman hokimi Anvarjon Ochilov, mahalla faollari, nuroniylar, ota-onalar, ustoz va murabbiylar hamda keng jamoatchilik vakillari ishtirok etdi.

Tadbirda tuman hokimi Anvarjon Ochilov so‘zga chiqib, yig‘ilganlarni O‘zbekiston Respublikasi davlat mustaqilligining 35 yilligi bilan samimiy muborakbod etdi. Shuningdek, bugungi kunda mamlakatimizda amalga oshirilayotgan keng ko‘lamli islohotlar, xususan, ta’lim va tarbiya sohasiga qaratilayotgan yuksak e’tibor o‘zining amaliy natijalarini berayotganini ta’kidladi.

Darhaqiqat, bugun yurtimizning turli hududlarida bunyodkorlik va obodonlashtirish ishlari bilan bir qatorda, aholi uchun zarur bo‘lgan ijtimoiy obyektlar barpo etilmoqda. Ayniqsa, bolalar ta’lim-tarbiyasi uchun yaratilayotgan sharoitlar kelajak avlodga bo‘lgan yuksak e’tiborning yorqin ifodasidir.

“Yangi O‘zbekiston — maktabgacha ta’limdan boshlanadi”, degan ezgu tamoyil asosida bu yo‘nalishda amalga oshirilayotgan ishlar natijasida hududlarda zamonaviy, barcha qulayliklarga ega maktabgacha ta’lim tashkilotlari soni tobora ortib bormoqda.

Talaliyon mahalla fuqarolar yig‘ini Suvchiqar qishlog‘ida OPEK dasturi asosida bunyod etilgan 49-sonli davlat maktabgacha ta’lim tashkiloti ham ana shunday ezgu sa’y-harakatlarning amaliy natijasidir.

Qiymati 3,6 milliard so‘m bo‘lgan mazkur zamonaviy muassasa 90 o‘rinli bo‘lib, qurilish ishlari “Fast qaulity building” MCHJ tomonidan amalga oshirildi.

Yangi bog‘chada bolalarning ta’lim-tarbiya olishi, mazmunli vaqt o‘tkazishi va har tomonlama rivojlanishi uchun zarur sharoitlar yaratilgan. Muassasa yorug‘ va shinam xonalar, zamonaviy jihozlar, o‘quv-tarbiya vositalari hamda bolalarning maroqli hordiq chiqarishi uchun zarur imkoniyatlar bilan ta’minlangan.

Endilikda Suvchiqar qishlog‘idagi 90 nafar jajji tarbiyalanuvchi zamonaviy va qulay sharoitda ta’lim-tarbiya oladi. Eng muhimi, yangi maktabgacha ta’lim tashkilotining ish boshlashi mahalladagi ota-onalarning farzandlarini sifatli maktabgacha ta’lim bilan qamrab olish imkoniyatlarini yanada kengaytiradi.

Tadbirda so‘zga chiqqanlar mamlakatimizda yosh avlod kamoloti, ularning ta’lim-tarbiyasi va kelajagi uchun yaratilayotgan bunday imkoniyatlar uchun minnatdorlik bildirdilar.

Yangi maktabgacha ta’lim tashkilotining foydalanishga topshirilishi Suvchiqar qishlog‘i hayotidagi muhim voqealardan biri bo‘ldi. Zero, bolalar uchun qurilgan har bir ta’lim maskani — bu shunchaki yangi bino emas, balki kelajak sari qo‘yilgan mustahkam qadamdir.

Mustaqillik bayrami arafasida foydalanishga topshirilgan ushbu zamonaviy maskan mahalla ahli uchun munosib bayram tuhfasi bo‘lishi bilan birga, farzandlar uchun yangi imkoniyatlar eshigini ochadi.

Yurtimizda bunyod etilayotgan bunday zamonaviy ta’lim maskanlari farzandlarimizning baxtli bolaligi, sifatli ta’lim-tarbiya olishi va kelajakda Vatanimizga munosib avlod bo‘lib voyaga yetishiga xizmat qiladi.