Buxoro viloyati Buxoro tumani hokimligi

Buxoro tumani hokimi Anvarjon Ochilov boshchiligidagi delegatsiyaning Xitoy Xalq Respublikasiga xizmat safari boshlandi. Mazkur tashrifdan ko‘zlangan asosiy maqsad — Buxoro tumaniga to‘g‘ridan to‘g‘ri xorijiy investitsiyalarni jalb etish, zamonaviy texnologiyalarni o‘zlashtirish, ilg‘or ishlab chiqarish tajribalarini o‘rganish hamda istiqbolli investitsiya loyihalarini amalga oshirish yuzasidan o‘zaro manfaatli hamkorlikni rivojlantirishdan iborat.
 

Xizmat safarining dastlabki kunida delegatsiya Xitoy Xalq Respublikasining Urumchi shahrida joylashgan DAYUZHIHUI kompaniyasi faoliyati bilan yaqindan tanishdi. Mazkur korxona kimyoviy o‘g‘itlar ishlab chiqarishga ixtisoslashgan bo‘lib, zamonaviy texnologiyalari, yuqori ishlab chiqarish quvvati va innovatsion yondashuvlari bilan Xitoyning ushbu yo‘nalishdagi yetakchi kompaniyalaridan biri hisoblanadi.

Tashrif davomida korxonada qo‘llanilayotgan zamonaviy ishlab chiqarish jarayonlari, mahsulot sifatini nazorat qilish tizimi hamda ekologik xavfsizlikni ta’minlash borasida amalga oshirilayotgan ishlar bilan yaqindan tanishildi. Shuningdek, korxona rahbariyati bilan o‘tkazilgan uchrashuvda qishloq xo‘jaligi sohasida zamonaviy agrotexnologiyalarni joriy etish, yuqori samaradorlikka ega kimyoviy o‘g‘itlar ishlab chiqarish va ushbu yo‘nalishda o‘zaro manfaatli hamkorlikni yo‘lga qo‘yish istiqbollari yuzasidan atroflicha fikr almashildi.

Ta’kidlash joizki, bunday xalqaro hamkorliklar hududning investitsiyaviy jozibadorligini oshirish, zamonaviy texnologiyalarni joriy etish, ishlab chiqarish salohiyatini yuksaltirish hamda yangi ish o‘rinlarini yaratishda muhim ahamiyat kasb etadi.

Xitoy Xalq Respublikasiga amalga oshirilayotgan xizmat safari doirasida yetakchi kompaniyalar, investorlar va tadbirkorlik subyektlari bilan qator uchrashuv hamda muzokaralar o‘tkazilishi rejalashtirilgan. Tashrif davomida erishiladigan kelishuvlar va istiqbolli hamkorlik loyihalari haqida batafsil ma’lumotlar navbatdagi xabarlarda yoritib boriladi.