Buxoro tumanida umumta’lim maktablarining yangi o‘quv yiliga tayyorgarligi o‘rganilmoqda
2026-07-30 15:10:00 / Yangiliklar
Yangi o‘quv yilini munosib kutib olish, umumta’lim maktablarida o‘quvchilar uchun qulay, xavfsiz va zamonaviy shart-sharoitlarni yaratish maqsadida tumandagi ta’lim muassasalarida tayyorgarlik ishlari izchil davom etmoqda.
Bu boradagi ishlarning amaliy holatini o‘rganish maqsadida Buxoro tumani hokimligi tomonidan tuzilgan ishchi guruh Rabotiqalmoq mahallasidagi 18-son umumta’lim maktabida bo‘lib, ta’lim muassasasining yangi o‘quv yiliga tayyorgarlik jarayonini ko‘zdan kechirdi.
O‘rganish davomida maktabning umumiy holati, o‘quv xonalari, mavjud infratuzilma, sport inshootlari, ma’muriy va yordamchi xonalar, sanitariya-gigiyena sharoitlari hamda maktab hududining obodonlashtirilishi atroflicha ko‘rib chiqildi.
Shuningdek, yangi o‘quv yiliga qadar amalga oshirilishi lozim bo‘lgan ta’mirlash, obodonlashtirish va tartibga keltirish ishlari holatiga alohida e’tibor qaratildi. Maktabda o‘quvchilar va pedagoglar uchun qulay muhit yaratish, dars jarayonlarini samarali tashkil etish hamda ta’lim sifati uchun zarur shart-sharoitlarni ta’minlash masalalari muhokama qilindi.
O‘rganish jarayonida aniqlangan ayrim masalalarni qisqa muddatlarda bartaraf etish, maktab hududini yanada obod va ko‘rkam holatga keltirish, mavjud infratuzilma va jihozlardan samarali foydalanish yuzasidan mas’ullarga aniq vazifalar belgilandi.
Ta’lim muassasasining yangi o‘quv yiliga tayyorgarligi faqat binolarni ta’mirlash yoki hududni obodonlashtirish bilan cheklanmay, o‘quvchilar uchun munosib ta’lim muhitini shakllantirish, ularning xavfsizligi va ta’lim olish imkoniyatlarini yanada yaxshilashni ham nazarda tutadi.
Shu nuqtayi nazardan, tumandagi barcha umumta’lim maktablarining yangi o‘quv yiliga tayyorgarlik holatini manzilli o‘rganish, aniqlangan kamchiliklarni o‘z vaqtida bartaraf etish va belgilangan vazifalar ijrosini nazorat qilish ishlari davom ettiriladi.
Zero, yangi o‘quv yilining dastlabki kunlaridanoq o‘quvchi va ustozlar uchun qulay sharoit yaratilishi ta’lim jarayonining samaradorligini oshirishda muhim omil hisoblanadi.