Buxoro viloyati Buxoro tumani hokimligi

Payshanba — Yoshlar kuni munosabati bilan Buxoro tumanining Rabotiqalmoq mahallasi binosida otaliqqa olingan yoshlar bilan navbatdagi uchrashuv tashkil etildi.

Uchrashuvdan ko‘zlangan asosiy maqsad yoshlarning jamiyat hayotidagi o‘rni va faolligini yanada oshirish, ularning ijtimoiy-iqtisodiy muammolarini o‘z vaqtida aniqlash, mavjud masalalarni manzilli o‘rganish hamda amaliy yechim topishdan iborat bo‘ldi.

Yuzma-yuz muloqot davomida har bir yoshning murojaati, muammosi, taklifi va tashabbuslari alohida tinglandi. Bildirilgan masalalarni ijobiy hal etish, yoshlarni qiynayotgan muammolarga yechim topish yuzasidan tegishli mas’ullarga aniq vazifalar belgilab berildi.

Suhbat jarayonida yoshlarning bandligini ta’minlash, ularni kasb-hunarga o‘qitish, zamonaviy mutaxassisliklarni egallashga yo‘naltirish, tadbirkorlik faoliyatiga jalb etish hamda bo‘sh vaqtlarini mazmunli tashkil etish masalalariga alohida e’tibor qaratildi.

Shuningdek, otaliqqa olingan yoshlarning o‘z biznesini yo‘lga qo‘yishi, zamonaviy kasb-hunarlarni o‘rganishi, sport mashg‘ulotlariga muntazam qatnashishi va turli ijtimoiy loyihalarda faol ishtirok etishi yuzasidan bildirilgan taklif va tashabbuslarni qo‘llab-quvvatlash bo‘yicha amaliy chora-tadbirlar belgilandi.

Bunday samimiy va manzilli muloqotlar yoshlarning muammolarini o‘z vaqtida aniqlash, ularni qo‘llab-quvvatlash, tashabbuslarini rag‘batlantirish hamda hayotda munosib o‘rin topishiga ko‘maklashishda muhim ahamiyat kasb etmoqda.

Yoshlar kuni doirasidagi bu kabi uchrashuvlar kelgusida ham davom ettirilib, har bir yosh bilan individual ishlash, ularning bandligi, ta’lim olishi va jamiyat hayotidagi faol ishtirokini ta’minlashga qaratilgan ishlar izchil davom ettiriladi.