Buxoro viloyati Buxoro tumani hokimligi

Buxoro tumanida maktabgacha ta’lim tizimini yanada rivojlantirish, bolajonlar uchun zamonaviy, qulay va xavfsiz sharoitlarni yaratish, ta’lim muassasalarining moddiy-texnik bazasini mustahkamlash borasidagi bunyodkorlik ishlari izchil davom etmoqda. Ana shunday loyihalardan biri Qavola Mahmud mahallasi Davlatobod qishlog‘ida joylashgan 46-son davlat maktabgacha ta’lim tashkilotida amalga oshirilmoqda.

Ayni paytda mazkur ta’lim maskani 5,5 milliard so‘m mablag‘ evaziga "OBOD O‘LKA QURILISH SERVIS" MCHJ tomonidan mukammal ta’mirlanmoqda. Loyiha doirasida binoni zamonaviy talablar asosida rekonstruksiya qilish, ichki va tashqi qismni to‘liq yangilash, muhandislik-kommunikatsiya tarmoqlarini ta’mirlash hamda hududni obodonlashtirish ishlari olib borilmoqda.
 

Ma’lumki, ushbu maktabgacha ta’lim tashkiloti o‘tgan asrning 80-yillarida kolxoz tomonidan qurilgan bo‘lib, uzoq yillar davomida yetarli darajada ta’mirlanmagani sababli ancha eskirib, qarovsiz holatga kelib qolgan edi. Bugungi kunda Prezidentimiz tomonidan maktabgacha ta’lim sohasiga qaratilayotgan yuksak e’tibor va keng ko‘lamli bunyodkorlik ishlari tufayli ushbu muassasa ham mutlaqo yangi qiyofa kasb etmoqda.
 

— Rahmat Prezidentimizga. Yillar davomida ta’mirtalab holga kelgan ushbu bog‘cha bugun zamonaviy ko‘rinishga ega bo‘layotgani, eng avvalo, farzandlarimizning munosib sharoitlarda tarbiya olishi uchun yaratilayotgan imkoniyatlarning yorqin ifodasidir, — deydi Xalq deputatlari Buxoro tumani Kengashi raisi Rashid Nabiyev.
 

Qurilish-ta’mirlash ishlarining borishi bilan tanishish maqsadida Xalq deputatlari Buxoro tumani Kengashi raisi Rashid Nabiyev hamda Kengash kotibiyati mudiri S. Samadov obyektga tashrif buyurdi. Ular amalga oshirilayotgan ishlar sifati, qurilish me’yorlariga rioya etilishi hamda belgilangan muddatlarda yakunlanishi yuzasidan mas’ullar bilan suhbatlashib, o‘z tavsiya va takliflarini bildirdilar.
 

Ta’kidlanganidek, mazkur loyiha yakunlangach, 46-son davlat maktabgacha ta’lim tashkiloti zamonaviy talablarga javob beradigan, barcha qulayliklarga ega maskanga aylanadi. Bu esa kelajak egalari bo‘lgan bolalarning sifatli ta’lim-tarbiya olishi, ularning sog‘lom va barkamol voyaga yetishiga xizmat qiladi.
 

Buxoro tumanida ta’lim muassasalarini yangilash va ularning infratuzilmasini rivojlantirishga qaratilgan bunday bunyodkorlik ishlari bundan buyon ham izchil davom ettiriladi.