Buxoro viloyati Buxoro tumani hokimligi

Buxoro tumanida tadbirkorlik subyektlarini har tomonlama qo‘llab-quvvatlash, ular uchun qulay ishbilarmonlik muhitini yaratish, faoliyat jarayonida yuzaga kelayotgan muammolarni tezkor hal etish hamda yangi tashabbuslarni ro‘yobga chiqarishga ko‘maklashish borasidagi ishlar izchil davom ettirilmoqda.

Shu maqsadda Buxoro tumani hokimi Anvarjon Ochilov tadbirkorlar bilan navbatdagi ochiq muloqot o‘tkazdi. Unda tuman prokurori, Ichki ishlar bo‘limi boshlig‘i, davlat tashkilotlari va idoralar mas’ullari, shuningdek, tumanda faoliyat yuritayotgan turli yo‘nalishdagi tadbirkorlar ishtirok etdi.

Uchrashuvda tadbirkorlik faoliyatini yanada rivojlantirish, mavjud ishlab chiqarish quvvatlarini kengaytirish, yangi loyihalarni amalga oshirish, investitsiyalarni jalb etish hamda hududda qo‘shimcha ish o‘rinlari yaratish masalalariga alohida e’tibor qaratildi.

Ochiq muloqot davomida tadbirkorlar tomonidan o‘z faoliyatida duch kelayotgan qator masalalar yuzasidan taklif va murojaatlar bildirildi. Jumladan, elektr energiyasi va tabiiy gaz ta’minoti, yer maydonlaridan samarali foydalanish, kredit mablag‘larini ajratish, ishlab chiqarish infratuzilmasini yaxshilash, muhandislik-kommunikatsiya tarmoqlariga ulanish hamda boshqa yo‘nalishlardagi masalalar muhokama qilindi.

Buxoro tumani hokimi Anvarjon Ochilov tadbirkorlarning murojaatlarini diqqat bilan tinglab, har bir masalani tegishli mutasaddilar ishtirokida atroflicha ko‘rib chiqdi. Muammolarni joyida hal etish imkoniyati mavjud bo‘lgan holatlar bo‘yicha tegishli choralar belgilandi. Qo‘shimcha o‘rganish va vaqt talab qiladigan masalalar esa nazoratga olinib, ularni hal etish bo‘yicha mas’ul rahbarlarga aniq topshiriqlar berildi.

Muloqot davomida tadbirkorlarning nafaqat mavjud muammolari, balki hudud iqtisodiy rivojiga xizmat qiladigan yangi taklif va tashabbuslari ham muhokama qilindi. Tadbirkorlarning faoliyatini qo‘llab-quvvatlash, ularning loyihalarini amalga oshirishga ko‘maklashish hamda byurokratik to‘siqlarni bartaraf etish bo‘yicha tizimli ishlarni davom ettirish zarurligi ta’kidlandi.

Bugungi kunda Buxoro tumanida kichik biznes va xususiy tadbirkorlikni rivojlantirish, ishlab chiqarish va xizmat ko‘rsatish sohalarini kengaytirish, aholi bandligini ta’minlashga qaratilgan chora-tadbirlar izchil amalga oshirilmoqda. Tadbirkorlar bilan bunday ochiq muloqotlar esa hudud iqtisodiy salohiyatini oshirish, yangi loyihalarni qo‘llab-quvvatlash va ishbilarmonlar uchun yanada qulay sharoitlar yaratishda muhim ahamiyat kasb etmoqda.

Kelgusida ham tadbirkorlar bilan muntazam uchrashuvlar tashkil etilib, ularning taklif va tashabbuslarini qo‘llab-quvvatlash, muammolarini tezkor hal etish hamda yangi imkoniyatlarni yaratish borasidagi ishlar davom ettiriladi.