Buxoro viloyati Buxoro tumani hokimligi

Mamlakatimizda maktabgacha ta’lim tizimini yanada rivojlantirish, bolalarni sifatli ta’lim bilan qamrab olish hamda ular uchun zamonaviy va qulay shart-sharoitlar yaratish borasida izchil islohotlar amalga oshirilmoqda. O‘zbekiston Respublikasi Prezidentining 2021-yil 18-sentabrdagi “Islom taraqqiyot banki” hamda OPEK Xalqaro taraqqiyot jamg‘armasi ishtirokida ta’lim infratuzilmasini rivojlantirishga qaratilgan loyihalarni amalga oshirish chora-tadbirlari to‘g‘risidagi qarori ijrosi doirasida Buxoro tumanida navbatdagi muhim ijtimoiy obyekt foydalanishga topshirildi.

Buxoro tumani Istiqbol mahallasining Quyi Kobdun qishlog‘ida bunyod etilgan 15-son davlat maktabgacha ta’lim tashkilotining tantanali ochilish marosimi bo‘lib o‘tdi. Tadbirda Xalq deputatlari Buxoro tuman Kengashi raisi R. Nabiyev, mahalla faollari, nuroniylar hamda keng jamoatchilik vakillari ishtirok etdilar.

120 nafar tarbiyalanuvchiga mo‘ljallangan mazkur zamonaviy maktabgacha ta’lim tashkiloti 4 milliard 200 million so‘m mablag‘ evaziga bunyod etildi. Qurilish ishlari “Fast Quality Building” MCHJ tomonidan sifatli va belgilangan muddatlarda amalga oshirildi.

Muassasada bolalarning har tomonlama barkamol voyaga yetishi uchun barcha zarur sharoitlar yaratilgan. Xususan, 4 ta zamonaviy guruh xonasi, musiqa va sport zali, oshxona, tibbiyot xonasi, bolalar uchun xavfsiz va zamonaviy o‘yin maydonchalari, zamonaviy mebel hamda o‘quv jihozlari, energiya tejamkor isitish-sovitish tizimi va boshqa zarur infratuzilmalar tashkil etilgan.

Mazkur ta’lim maskanining foydalanishga topshirilishi Quyi Kobdun qishlog‘i aholisi uchun unutilmas voqea bo‘ldi. Shu kungacha qishloqdagi ko‘plab yosh oilalar bog‘cha yoshidagi farzandlarini uzoq hududlardagi maktabgacha ta’lim tashkilotlariga qatnatishga yoki u yerga joylashtirishda turli qiyinchiliklarga duch kelayotgan edi. Endilikda esa kobdunliklarning ko‘p yillik orzusi ro‘yobga chiqib, bolajonlar o‘z yashash hududining o‘zida barcha zamonaviy qulayliklarga ega maktabgacha ta’lim tashkilotida tarbiya olish imkoniyatiga ega bo‘ldilar.

Yangi maktabgacha ta’lim tashkilotining ishga tushirilishi nafaqat maktabgacha ta’lim qamrovini kengaytirishga, balki yosh avlodni har tomonlama barkamol etib tarbiyalash, ularning bilim va salohiyatini yuksaltirish hamda kelajak poydevorini mustahkamlashga xizmat qiladi. Bunday bunyodkorlik ishlari yurtimizda inson qadri, ayniqsa, bolalar ta’limi va tarbiyasiga qaratilayotgan yuksak e’tiborning yana bir amaliy ifodasidir.