Buxoro viloyati Buxoro tumani hokimligi

Yoshlarning bandligini ta'minlash, daromadini oshirish hamda ularning tadbirkorlik tashabbuslarini qo‘llab-quvvatlash borasida amalga oshirilayotgan islohotlar bugun o‘zining amaliy samarasini bermoqda. Buxoro tumanining Bog‘ikalon mahallasida ham Prezidentimiz tashabbusi bilan yoshlarga ajratilgan yer maydonlari mehnatsevar yigit-qizlar uchun barqaror daromad manbaiga aylanmoqda.

Bugungi kunda Bog‘ikalon mahallasida 7 mingdan ortiq aholi istiqomat qiladi. Shundan qariyb 2 ming nafari yoshlarni tashkil etadi. O‘zbekiston Respublikasi Prezidentining **“Yoshlarga yer ajratish orqali ularning daromadlarini oshirish va bandligini ta'minlash, shuningdek, yangi yer maydonlarini o‘zlashtirish chora-tadbirlari to‘g‘risida”**gi PQ-153-son qarori asosida mahalladagi 52 nafar yoshga suv ta'minoti qulay, unumdor hamda aholi yashash hududiga yaqin joylardan jami 10 gektar yer maydoni ajratib berilgan. Bu imkoniyat ko‘plab yoshlarning o‘z mehnati bilan daromad topishi va tadbirkorlik faoliyatini yo‘lga qo‘yishiga xizmat qilmoqda.

Ana shunday tashabbuskor yoshlardan biri Abdullo Sadullayevdir. Asl kasbi usta bo‘lgan Abdullo bugun dehqonchilik bilan ham muvaffaqiyatli shug‘ullanmoqda. Unga ajratilgan 20 sotix yer maydonining 2,5 sotixida issiqxona tashkil etib, pomidor yetishtirmoqda. Qolgan yer maydonida esa turli sabzavot mahsulotlarini parvarishlab, mo‘l hosil olishga intilmoqda.

E'tiborlisi shundaki, Abdullo bu ishni oila a'zolari bilan birgalikda amalga oshirmoqda. Ularning ahil mehnati, yerdan oqilona foydalanishi va har bir qarich yerning qadriga yetishi bugun o‘z samarasini bermoqda. Yetishtirilayotgan mahsulotlar oila daromadini oshirish bilan birga, bozorlarni yangi va sifatli sabzavot mahsulotlari bilan ta'minlashga ham munosib hissa qo‘shmoqda.

— Muhtaram Prezidentimizga Bog‘ikalon mahallasi yoshlari nomidan samimiy minnatdorlik bildiraman. Bugun biz yoshlarga yaratilayotgan imkoniyatlardan unumli foydalanib, o‘z mehnatimiz evaziga munosib daromad topyapmiz. Mahallamiz aholisi azaldan dehqonchilik bilan shug‘ullanib keladi. Biz ham ana shu an'anani davom ettirib, ajratilgan har bir qarich yerdan samarali foydalanishga harakat qilyapmiz, — deydi Abdullo Sadullayev.

Bugungi kunda Bog‘ikalon mahallasida yoshlarga ajratilgan yer maydonlari samarali o‘zlashtirilmoqda. Bu esa yoshlarning bandligini ta'minlash, daromadini oshirish, oilalar farovonligini yuksaltirish hamda mahallada dehqonchilik madaniyatini yanada rivojlantirishga xizmat qilmoqda.

Abdullo Sadullayevning mehnatsevarligi, tashabbuskorligi va yerdan unumli foydalanish borasidagi tajribasi bugun ko‘plab yoshlarga ibrat bo‘lmoqda. Uning faoliyati davlatimiz tomonidan yoshlarga yaratilayotgan imkoniyatlardan oqilona foydalanish orqali halol mehnat bilan barqaror daromad topish mumkinligini yaqqol namoyon etmoqda.