Buxoro viloyati Buxoro tumani hokimligi

Assalomu alaykum, aziz tumandoshlar, qadrli fermerlar!

Yaqinda tumanimiz pillakorlari yilning ilk hosili — pillani yetishtirish va topshirish bo‘yicha shartnomaviy rejani ortig‘i bilan bajarib, barchamizni quvontirgan edi. Pillakorlarimizning ushbu yutug‘idan so‘ng bugun g‘allakorlarimiz ham tuman bo‘yicha g‘alla topshirish rejasini ortig‘i bilan bajardilar.

Joriy yilda tumandagi 252 ta fermer xo‘jaligining 5 462 gektar maydonida yetishtirilgan g‘allani parvarishlash va bugungi natijaga erishishda 9 oy davomida minglab fidoyi tumandoshlarimiz, jumladan, fermerlar, dehqonlar, qishloq xo‘jaligi sohasi vakillari, agronomlar, suvchilar, mexanizatorlar hamda klaster mutaxassislari tinimsiz mehnat qildilar.

O‘rim-yig‘im davrida esa tuman hokimligi xodimlari, ichki ishlar bo‘limi xodimlari, qo‘riqlash bo‘limi xodimlari, favqulodda vaziyatlar bo‘limi xodimlari, kombayn haydovchilari, yuk tashuvchi avtomobil haydovchilari, 20 ta otryad tarkibiga biriktirilgan mas’ullar va boshqa tumandoshlarimiz yetishtirilgan hosilning so‘nggi donigacha nes-nobud bo‘lishining oldini olib, uni g‘alla qabul qilish maskanlariga o‘z vaqtida yetkazishda munosib hissalarini qo‘shdilar.

Shu o‘rinda g‘alladan mo‘l hosil olgan “Mustafo”, “Faxriddin Chorvador”, “Madaniyat Muhammad Ismat”, “Oybek”, “Samad Charosxon”, “Do‘stmurod Davron”, “Said Davron Nodir”, “Nozima Barchin Oybek”, “Karim Qahhor”, “Dilnoz o‘g‘li Abduxalil”, “Hamdamobod”, “Feruza Yo‘ldosh”, “Islom Narziobod”, “Qosim Nabiyev” va “Fayzulloobod” fermer xo‘jaliklarini alohida ta’kidlab o‘tmoqchiman.

Albatta, zamindan mo‘l hosil olish uchun sifatli urug‘, qulay sharoit va zamonaviy texnika vositalari bilan bir qatorda g‘ayrat va shijoat ham zarur. Buxoro tumanining g‘alla va g‘o‘za dalalarida mehnat qilayotgan insonlar ana shunday serg‘ayrat va fidoyi insonlar ekanini bugungi natijalar yana bir bor isbotladi.

G‘alladan bo‘shatilgan yer maydonlariga takroriy ekin ekish ishlari ham avj pallaga chiqdi. Bunda har bir fermer xo‘jaligi kambag‘allikni qisqartirish maqsadida ijtimoiy himoyaga muhtoj oilalarga yer ajratib, serdaromad qishloq xo‘jaligi ekinlarining urug‘ va ko‘chatlarini bosqichma-bosqich ekishga kirishmoqda.

Aziz dehqon va fermerlar, qadrli suvchilar hamda klasterlar xodimlari!

Sizlarni erishgan ushbu ulkan g‘alabangiz bilan chin qalbimdan muborakbod etaman. Barchangizga sihat-salomatlik, oilaviy baxt-saodat, mas’uliyatli va sharafli mehnat faoliyatingizda ulkan zafarlar, xonadonlaringizga qut-baraka hamda xotirjamlik tilayman.

Hurmat bilan,

Anvarjon Ochilov,
Buxoro tumani hokimi