Buxoro tumanida g‘alla rejasini bajargan fermer xo‘jaliklari soni 80 taga yaqinlashdi
2026-06-10 14:05:00 / Yangiliklar
Buxoro tumani mirishkorlari viloyatda qishloq xo‘jaligi mahsulotlari yetishtirish bo‘yicha doimo peshqadamlar safidan joy olib kelmoqda. Ayniqsa, pilla, g‘alla va paxta yetishtirishda erishilayotgan yutuqlar tumanning mehnatkash dehqon va fermerlari zahmatining, yerga bo‘lgan mehrining hamda yuksak mas’uliyatining yorqin ifodasidir.
Ana shunday fidokorona mehnat samarasi o‘laroq, joriy yilda ham g‘alladan mo‘l hosil yetishtirildi. Ayni kunlarda ushbu qutlug‘ ne’matni yig‘ib olish ishlari tuman hududlarida uyushqoqlik bilan davom etmoqda. Dalalarda zamonaviy kombaynlar uzluksiz harakatda bo‘lib, pishib yetilgan hosilni qisqa muddatlarda va talafotlarsiz yig‘ib olishga alohida e’tibor qaratilmoqda.
Quvonarlisi, bugungi kunga qadar Buxoro tumanida davlatga g‘alla topshirish bo‘yicha belgilangan rejani bajargan fermer xo‘jaliklari soni 80 taga yaqinlashdi. Bu esa g‘allakorlarning mavsumga puxta tayyorgarlik ko‘rgani, agrotexnik tadbirlarni o‘z vaqtida va sifatli amalga oshirgani hamda hosil uchun fidoyilik bilan mehnat qilganining amaliy natijasidir.
Ayni paytda Buxoro tumani hokimi Anvarjon Ochilov hududlarda bo‘lib, g‘alla o‘rim-yig‘im ishlari jarayoni bilan yaqindan tanishmoqda. Dalalarda fermerlar, kombaynchilar va mexanizatorlar bilan uchrashib, hosilni nes-nobud qilmasdan yig‘ib olish, o‘rim sur’atlarini yanada jadallashtirish hamda davlat xirmoniga don yetkazib berishni o‘z vaqtida tashkil etish yuzasidan tegishli tavsiya va topshiriqlar bermoqda.
Tumanda o‘rim-yig‘im mavsumini samarali tashkil etish maqsadida zarur texnika va transport vositalari safarbar etilgan. Barcha kuch va imkoniyatlar hosilni sifatli va talafotlarsiz yig‘ib olishga yo‘naltirilgan.
Darhaqiqat, bugungi natijalar Buxoro tumani dehqon va fermerlarining mashaqqatli mehnati, boy tajribasi va matonatining samarasidir. Mavsum davom etar ekan, tuman g‘allakorlari davlat xirmoniga munosib hissa qo‘shish hamda erishilgan yutuqlarni yangi marralar bilan mustahkamlash yo‘lida astoydil mehnat qilmoqdalar.