Buxoro viloyati Buxoro tumani hokimligi

Aholi o‘rtasida sog‘lom turmush tarzini targ‘ib qilish, jismoniy faollikni oshirish, turli kasalliklarning oldini olish, ayniqsa yoshlar o‘rtasida sport-sog‘lomlashtirish tadbirlarini keng ommalashtirish maqsadida respublikamizning barcha hududlarida “Salomatlik marafoni — baxtli hayotga qadam” loyihasi amalga oshirilmoqda.

Mazkur loyiha doirasida Buxoro tumanida ham may oyi davomida o‘tkaziladigan tadbirlarga tantanali ravishda start berildi.

Tadbirda Buxoro tuman hokimi Anvarjon Ochilov boshchiligidagi mas’ullar, tuman faollari, yoshlar, sportsevar fuqarolar, mahalla vakillari, nuroniylar hamda keng jamoatchilik vakillari ishtirok etdi.

Dastlab tuman markaziy ko‘chasi bo‘ylab yurish marafoni tashkil etildi. Marafon davomida ishtirokchilar sog‘lom turmush tarziga amal qilish, muntazam jismoniy faollik bilan shug‘ullanish hamda sportni hayot tarziga aylantirishga da’vat etildi. Shundan so‘ng tadbir ishtirokchilari tuman markaziy o‘yingohida jam bo‘lishdi.

Tadbir davomida aholini tibbiy ko‘rikdan o‘tkazish ishlari ham tashkil etilib, fuqarolarning salomatlik holatini nazorat qilish, kasalliklarni erta aniqlash hamda sog‘lom hayot tarzini targ‘ib qilishga alohida e’tibor qaratildi.

Tadbirda so‘zga chiqqanlar tomonidan inson salomatligi eng katta boylik ekani, mamlakatimizda sog‘lom turmush tarzini shakllantirish, ommaviy sportni rivojlantirish hamda yoshlarni jismoniy faollikka keng jalb etishga davlat siyosati darajasida alohida e’tibor qaratilayotgani ta’kidlandi.

Shuningdek, Prezidentimiz Shavkat Mirziyoyev tomonlaridan aholi salomatligini mustahkamlash, sportni ommalashtirish hamda sog‘lom avlodni voyaga yetkazish borasida amalga oshirilayotgan islohotlar bugungi kunda o‘zining ijobiy natijalarini berayotgani qayd etildi.

Ta’kidlanganidek, loyiha doirasida tuman bo‘ylab sport musobaqalari, ommaviy yugurish tadbirlari, sog‘lomlashtirish aksiyalari hamda targ‘ibot ishlari davom ettiriladi.

Tadbir yakunida barcha fuqarolar sog‘lom turmush tarziga amal qilishga, sport bilan muntazam shug‘ullanishga hamda marafonda faol ishtirok etishga chaqirildi.