Aholi va qishloq xo‘jaligini ro‘yxatga olish yuzasidan mahalla yettiligi bilan ochiq muloqot o‘tkazildi
2026-02-13 13:35:00 / Yangiliklar
Buxoro tumanida aholi va qishloq xo‘jaligini ro‘yxatga olish tadbirlarini samarali tashkil etish hamda jarayonlarning sifatli o‘tishini ta’minlash maqsadida ochiq muloqot tashkil etildi. Mazkur uchrashuv Buxoro tumani hokimi Anvarjon Ochilov boshchiligida mahalla yettiligi ishtirokida bo‘lib o‘tdi.
Ta’kidlanganidek, hozirgi kunda mamlakatimizda aholi va qishloq xo‘jaligini ro‘yxatga olish tadbirining ikkinchi bosqichi — an’anaviy, ya’ni xonadonma-xonadon yurib ma’lumot to‘plash jarayonlari davom etmoqda. Ushbu bosqichda ro‘yxatga oluvchilar, eng avvalo, onlayn ro‘yxatdan o‘tmagan fuqarolar, shuningdek, birinchi bosqichda savolnomani to‘liq yoki to‘g‘ri to‘ldirmagan aholi xonadonlariga tashrif buyurib, zarur ma’lumotlarni aniqlashtirmoqda.
Ochiq muloqot davomida ro‘yxatga olish jarayonida uchrayotgan muammolar, ularni bartaraf etish choralari hamda mahalla yettiligining bu boradagi mas’uliyati yuzasidan fikr almashildi. Shuningdek, jarayonlarni belgilangan muddatlarda yakunlash, aholini faol jalb etish hamda ma’lumotlarning haqqoniyligini ta’minlash bo‘yicha zarur topshiriqlar berildi.
Uchrashuv yakunida mas’ullarga ro‘yxatga olish tadbirlarini tizimli tashkil etish, xonadonlarga kirib borish darajasini oshirish hamda aholi o‘rtasida tushuntirish ishlarini kuchaytirish yuzasidan aniq vazifalar belgilab berildi.
Buxoro tuman hokimligi axborot xizmati