Buxoro viloyati Buxoro tumani hokimligi

Xalq deputatlari Buxoro tumani Kengashining navbatdagi 18-sessiyasi bo‘lib o‘tdi. Sessiyada tumanni ijtimoiy-iqtisodiy rivojlantirish, infratuzilmani yaxshilash, sog‘liqni saqlash va Kengash faoliyatini tashkil etishga oid qator muhim masalalar ko‘rib chiqildi.

Sessiya kun tartibiga muvofiq, dastlab Buxoro tumani hokimining birinchi o‘rinbosari Sarvar Ochilov tomonidan tumanda “Yangi O‘zbekiston qiyofasida”gi hamda “Og‘ir mahallalar”ni rivojlantirish uchun zarur infratuzilma bilan ta’minlash borasida 2026-yilda amalga oshiriladigan ishlar yuzasidan hisobot taqdim etildi. Unda hududlarda yo‘l, elektr ta’minoti, ichimlik suvi, ijtimoiy obyektlar hamda muhandislik kommunikatsiyalarini yaxshilashga qaratilgan rejalar haqida batafsil ma’lumot berildi.

Shundan so‘ng Xalq deputatlari Buxoro tumani Kengashi va Kengash doimiy komissiyalarining 2026-yil uchun mo‘ljallangan ish rejalarini tasdiqlash masalasi ko‘rib chiqildi. Mazkur masala yuzasidan Kengash raisi Rashid Nabiyev axborot berdi.

Sessiyada shuningdek, deputatlarning 2026-yil davomida o‘z faoliyati yuzasidan saylovchilari oldida axborot berishini tashkil etish masalasi ham muhokama qilindi. Bu borada Reglament va deputatlik odob-axloqiy masalalari bo‘yicha doimiy komissiya raisi Gulnora Atoeva tomonidan tegishli takliflar bildirildi.

Kun tartibidagi navbatdagi masala — tumanda bolalar saratoniga qarshi kurashish bo‘yicha 2025-yil davomida amalga oshirilgan ishlar yuzasidan tuman tibbiyot birlashmasi hisobotini ko‘rib chiqish bo‘ldi. Mazkur masala yuzasidan tibbiyot birlashmasi boshlig‘i o‘rinbosari Baxtiyor Xudoyarov axborot berdi hamda kelgusidagi vazifalar belgilab olindi.

Sessiyada O‘zbekiston Respublikasi Vazirlar Mahkamasining 2024-yil 11-oktabrdagi 665-son qaroriga muvofiq tuman Obodonlashtirish boshqarmasi tasarrufidagi ichki yo‘llarni saqlash va joriy ta’mirlash ishlari bo‘yicha 2025-yil dastlabki manzilli ro‘yxatida tasdiqlangan mablag‘lardan iqtisod qilingan mablag‘larni yo‘naltirish masalasi ham ko‘rib chiqildi. Bu bo‘yicha “Obodonlashtirish” boshqarmasi mas’uli Izom Qurbonov ma’lumot berdi.

Shuningdek, Buxoro tumani hokimining 2026-yil 23-yanvardagi 32-2-32-Q/26-sonli qarorini tasdiqlash masalasi ham sessiya kun tartibidan o‘rin oldi.

Sessiya yakunida kun tartibidagi barcha masalalar yuzasidan tegishli qarorlar qabul qilindi hamda mas’ullarga aniq vazifalar belgilab berildi.

Buxoro tumani hokimligi Axborot xizmati