Buxoro tuman hokimi Anvarjon Ochilov 8-Chorbakr saylov okrugi saylovchilari bilan uchrashdi
2025-12-23 11:50:00 / Yangiliklar
“Xalq davlat idoralariga emas, davlat idoralari xalqimizga xizmat qilishi kerak”. Prezidentimiz tomonidan ilgari surilgan va bugun hayotimizdan tobora chuqurroq o‘rin olayotgan ushbu tamoyil yurtdoshlarimizning hayotdan rozi bo‘lib yashashiga zamin yaratmoqda. Bugun tuman markazidan tortib tumanimizning eng uzoq hududida yashayotgan yurtdoshlarimizgacha islohotlarning real natijalarini o‘z hayotida ko‘ra boshlayotgani, bu yangilanishlar minglab oilalar hayoti va dunyoqarashining o‘zgarishiga turtki bo‘layotgani buning yaqqol isbotidir.
Muhtaram Yurtboshimiz Shavkat Mirziyoyev tashabbusi bilan xalq ichiga kirib, uning dardu tashvishlarini tinglash, og‘irini yengil qilish, odamlarga munosib turmush sharoiti yaratib berish barcha bo‘g‘indagi rahbar va mansabdor shaxslarning asosiy vazifasi etib belgilangan.
Shu munosabat bilan Xalq deputatlari Buxoro tuman Kengashi raisi Anvarjon Ochilov “Shergiron” mahallasida bo‘lib, 8-Chorbakr saylov okrugi saylovchilari bilan uchrashdi, suhbatlashdi hamda ularning muammo va tashvishlarini eshitdi.
Uchrashuv davomida tuman rahbari ushbu mahallada yo‘l, tabiiy gaz va elektr ta’minoti masalalari, aholi bandligini ta’minlash, tadbirkorlikni qo‘llab-quvvatlash, ijtimoiy himoya borasida amalga oshirilayotgan ishlar va rejalar to‘g‘risida ma’lumot berib o‘tdi. Muloqot davomida fuqarolarning taklif va savollari tinglandi.