Buxoro tumani: “Zarmanoq” mahallasida yashovchi Shuhrat Teshayev rahbarligidagi “Sangina Shoxijahon” MCHJ mahalladagi ishsiz xotin-qizlarni ish bilan ta’minlamoqda
2025-12-22 13:25:00 / Yangiliklar
Buxoro tumani “Zarmanoq” mahallasida istiqomat qiluvchi Shuhrat Teshayev rahbarligidagi “Sangina Shoxijahon” MCHJ bir necha yildan buyon maxsus kiyimlar tikish bilan shug‘ullanib kelmoqda. Korxona faoliyati nafaqat sifatli mahsulot ishlab chiqarishga qaratilgan, balki mahalladagi xotin-qizlarning bandligini ta’minlashga ham xizmat qilmoqda.
Hozirgi kunda “Sangina Shoxijahon” MCHJ kasanachilik asosida 20 nafar ishsiz xotin-qizni ish bilan ta’minlab, ularning oilaviy byudjetlarini mustahkamlashiga yordam bermoqda. Shuhrat Teshayevning tashabbusi nafaqat oilaviy tadbirkorlikni rivojlantirish, balki mahalladagi xotin-qizlarning mustaqil daromad topish imkoniyatlarini kengaytirishga qaratilgan.
— “Bizning maqsadimiz xotin-qizlarni ish bilan ta’minlash, ularning o‘ziga ishonch va mustaqilliklarini oshirishdir,” — deydi Shuhrat Teshayev. — Kasanachilik orqali ularning daromad topishiga yordam berib, mahalla iqtisodiyotiga ham o‘z hissamizni qo‘shmoqdamiz.
Bunday tashabbuslar xotin-qizlarning ijtimoiy faolligini oshirish, ularni mehnatga jalb qilish va oilaviy barqarorlikni ta’minlashda muhim rol o‘ynaydi. Shuhrat Teshayev va uning jamoasi mahalladosh xotin-qizlar uchun o‘rnak bo‘lib, boshqa tadbirkorlarni ham ish o‘rinlari yaratishga ilhomlantirmoqda.