Romitan: “Sho‘robod”da 10 nafar jajji bolajonning sunnat to‘yi o‘tkazildi
2024-09-20 10:30:00 / Yangiliklar
Romitan tumani hokimligi, prokuraturasi hamda mahalliy saxovatpesha tadbirkorlar tashabbusi bilan “Sho‘robod” mahalla fuqarolar yig‘inidagi “To‘y baraka” tantanalar saroyida ijtimoiy himoyaga muhtoj, “Temir daftar” va “Ayollar daftar”lariga kiritilgan kamxarj oilalar farzandlari, asosan, maktab va maktabgacha ta’lim muassasalari tarbiyalanuvchilaridan iborat 10 nafar bolaning sunnat to‘yi tashkil etildi.
To‘yda tuman hokimligi, ma’muriy sektor rahbarlari, tuman Xalq qabulxonasi, maktab va maktabgacha ta’lim bo‘limi mas’ullari, homiy tadbirkorlar, nuroniylar, to‘ybolalar va ular yaqinlari, mahalla faollari hozir bo‘ldilar.
Marosim avvalida to‘yxona oldida “Ayollar daftari”da turuvchi ehtiyojmand oilalardan saralangan 30 nafar ayolga layoqatiga qarab tikuv mashinasi tantanali ravishda topshirildi. Bu tuhfa ularga yakka tartibda ishlab, daromad topishlari uchun imkoniyat. Shuningdek, arzon narxlarda tashkil qilingan oziq-ovqat mahsulotlari savdo yarmarkasi yig‘ilganlar e’tiborini tortdi.
Shundan so‘ng, tantana tuman imom xatibining Qur’on tilovati, ezgu maqsadda tashkil qilingan sunnat to‘yi bolajonlari sharafiga qilingan duoi xayrlari bilan boshlandi.
Tadbirda so‘z olganlar barcha yig‘ilganlarni, sunnat to‘yini nishonlanayotgan bolajonlarni va ularning ota-onalarini samimiy muborakbod etdilar. Ertamiz egalariga bosh-oyoq sarpolar, velosiped va boshqa esdalik sovg‘alari topshirildi.
Tadbirda ishtirok etgan nuroniy otaxonu onaxonlar yurt ravnaqi, farzandlar ta’lim-tarbiyasi xususida fikr–mulohazalarini bayon etishib, sunnat to‘yi nishonlanayotgan bolajonlarning kelajakda yurtimiz koriga kamarbasta yetuk inson bo‘lib voyaga yetishlariga ishonch bildirdilar.
Tantana fayzli va to‘kin dasturxon atrofida davom etdi. Davraga milliy taom–osh tortilib, yig‘ilganlar tuman madaniyat bo‘limi badiiy havaskorlarining konsert dasturi, kuy-qo‘shiqlaridan bahramand bo‘ldilar.
Viloyat hokimligi matbuot xizmati