Vobkent: "Mo‘minobod" MFY da paxta mavsumi qizg‘in bormoqda
2024-09-19 19:20:00 / Yangiliklar
Bugun oppoq libosga burkangan paxtazor jasorat maydoniga aylangan go‘yo. Bunda terimchi hasharchilarga qulay sharoit yaratish, kunlik terim sur’atini oshirish, paxtani qabul maskaniga tashishda traktor agregatlarini shay qilish, muhimi mehnatga o‘z vaqtida haq to‘lash, ilg‘or terimchilarni muntazam rag‘batlantirishga alohida e’tibor qaratilmoqda.
Shu kunlarda "Mo‘minobod" mahalla fuqarolar yig‘inida faoliyat yuritayotgan “Ravshan Rashid Lochinbek” fermer xo‘jaligi paxta dalalarida ham paxta yig‘im-terimi jadal bormoqda. Joriy yil erta bahorida xo‘jalik mirishkorlari 39 gektar yerda paxtaning “Buxoro-8” naviga mansub chigit qadab, g‘o‘za parvarishini talab darajasida olib bordilar. Mashaqqatli mehnat samarasida bugun dalada mo‘l hosil bo‘y ko‘rsatib turibdi.
Terimning dastlabki kunidan “Ravshan Rashid Lochinbek” fermer xo‘jaligi dalasida yuzga yaqin hasharchi terim sur’atini oshirmoqda. Ko‘makchilar kuchi bilan bir kunda katta xirmonga 12 tonna atrofida “oq oltin” kiritilmoqda. Dolzarb pallada dalada ilg‘or terimchilardan Zulxumor Rajabova, Gulchehra Hodiyeva, Rohila Muqimova singari chevarlar kuniga 150 kilogramdan paxta terib, hosil salmog‘ini oshirmoqdalar.
Fermer xo‘jaligi mirishkorlari esa hademay 164 tonnalik “oq oltin” xirmonini ko‘tarib, dehqonchilik mavsumini katta daromad bilan yakunlash maqsadida astoydil harakatdalar. Xirmoningizga baraka bersin, aziz dala ilg‘orlari!
Viloyat hokimligi matbuot xizmati