Olot: “G‘anchi Chandir”da tayanch ustunlari o‘rnatilib, “Bunyodkor” mahallasining yo‘li shag‘allashtirilmoqda
2024-09-19 18:05:00 / Yangiliklar
Yoz oylarida hududda ta’mirga muhtoj bo‘lgan o‘nga yaqin ko‘chada 10 kilometrdan oshiq yo‘l qismida shag‘allashtirish ishlari olib borilgan bo‘lib, shu kunlarda “Bunyodkor” mahallasining Mustaqillik va Iftixor ko‘chalarida qariyb 1,5 kilometr yo‘l qismini epaqaga keltirib, shag‘al bostirish ishlari davom ettirilmoqda. Bunda tuman obodonlashtirish boshqarmasi va yo‘llardan foydalanish korxonasi davlat muassasasining maxsus texnika va mexanizmi, o‘ndan ortiq ishchi-mutaxassisi alohida jonbozlik ko‘rsatmoqda.
Shuningdek, ayni kunda tuman elektr ta’minoti korxonasi tomonidan fuqarolardan kelib tushayotgan murojaatlar ijrosiga e’tibor qaratilmoqda. Hududda past kuchlanishli elektr tarmoqlarida modernizatsiya ishlari olib borilib, eskirgan tarmoqni yangilash, transformator punktini ta’mirlash yoki qo‘shimcha o‘rnatish bilan elektr quvvatini oshirish, kabel liniyasini tortish, simyog‘ochlarni sement-beton tayanch ustuniga yangilash choralari ko‘rilmoqda.
Xususan, ayni kunda bir guruh ishchi-mutaxassislar G‘anchi Chandir mahallasidagi eskirgan yog‘och ustunlarni maxsus texnika yordamida demontaj qilishib, deyarli 1 kilometrga yaqin tarmoqda temir-beton tayanch ustunlarini o‘rnatish va zamonaviy kabel liniyasini tortish ishlarini bajarmoqdalar. Bu bilan hududda elektr energiyasi ta’minotida kuzatilayotgan nuqson va kamchiliklar bartaraf etilmoqda.
Viloyat hokimligi matbuot xizmati