Xo‘jayli: Hududni Buxoro tajribasi asosida rivojlantirish jadallashgan
2024-08-28 19:25:00 / Yangiliklar
Xayrli tashabbuslar doirasida 2022-2024-yillarda Xo‘jaylida qiymati 549 milliard so‘mga teng loyihalarni amalga oshirish ko‘zda tutilgan edi. Mazkur keng qamrovli ishlar tumanda sanoat ishlab chiqarish va xizmat ko‘rsatish tarmoqlarini kengaytirish, yangi yerlarni o‘zlashtirib, bog‘-rog‘lar barpo etish, yo‘l ta’miri, irrigatsiya tizimini tartibga keltirish, gidroponika usulida qishloq xo‘jaligi mahsulotlari yetishtirish, hudud infratuzilmasini ravnaq toptirish kabi yo‘nalishlarda qator loyihalarni o‘z ichiga oladi. Buxoro tajribasi asosida ro‘yobga chiqayotgan bu yangilanishlar pirovardida hududni rivojlantirish, aholi turmush darajasini yanada yaxshilash imkonini beradi.
Shunga ko‘ra, shu kunlarda tumanni iqtisodiy-ijtimoiy rivojlantirish, hudud muhandislik–kommunikatsiya tarmoqlarini qayta tiklash–ta’mirlash va obodonlashtirish ishlari jadal davom etmoqda. Orolbo‘yi zaminida tashkil etilgan Buxoro viloyati Shtabida hududni rivojlantirishga safarbar qilingan barcha kuch hamda vositalar kundalik ishi muvofiqlashtirib borilmoqda. Ayni shu maqsadda Buxoro viloyati hokimining birinchi o‘rinbosari Botir Ahmedov boshchiligidagi qator tashkilot va idoralar rahbarlari Xo‘jaylida bo‘lib turishibdi.
Xo‘jayli tuman hokimligida o‘tkazilgan muhokama yig‘ilishida Buxoro viloyati hokimligi tomonidan tumanni ijtimoiy-iqtisodiy rivojlantirish bo‘yicha amalga oshirilgan ishlar hamda yil yakuniga qadar bajarilishi lozim bo‘lgan ustuvor vazifalar keng muhokama qilindi.
Ta’kidlanishicha, eng avvalo, Xo‘jayli tumanidagi sharoiti og‘ir oilalar va fuqarolarni qo‘llab-quvvatlash hamda ovul va mahallalar infratuzilmasini rivojlantirish bo‘yicha umumiy qiymati 58,6 mlrd.so‘mlik qurilish-montaj ishlarini amalga oshirish rejalashtirib olingan.
Bugungi kunda 10,450 mlrd.so‘m mablag‘ ajratilib, uning 6,750 mlrd.so‘mi moliyalashtirilgan. Mazkur mablag‘lar hisobiga 382 ta og‘ir turmush sharoitidagi oilalar uy–joylarining tom qismlari to‘liq shifer (profnastil) qoplamasi bilan yopildi. Bundan tashqari, 18 ta o‘ta og‘ir sharoitdagi oilalarga to‘liq yangida uy-joy qurib foydalanishga topshirildi.
Bundan tashqari, 2022-2023-yillarda davomida Buxoro viloyati Uy-joy kommunal xizmat ko‘rsatish boshqarmasi tomonidan tumandagi 32 ta qo‘p qavatli uylarning fasad qismlari to‘liq ta’mirlandi.Mazkur ishlarni amalga oshirish uchun Buxoro viloyati mahalliy budjetidan 1 milliard 700 mln.so‘m mablag‘lar sarflandi.
Shuningdek, Buxoro viloyati Avtomobil yo‘llari boshqarmasi tomonidan tumandagi 36 km ichki yo‘llarda shag‘allashtirish ishlari bajarildi. Hududning elektr ta’minotini yaxshilash maqsadida tuman elektr ta’minoti korxonasi bilan hamkorlikda 23,5 km havo tarmoqlari yangilandi, 402 dona yog‘och tipdagi tayanchlar beton tayanchlarga almashtirildi, 3 dona trasformator punktlari yangidan o‘rnatildi.
O‘tgan davr mobaynida Xo‘jayli tumanida qishloq xo‘jaligini rivojlantirish sohasida ham tegishli ishlar amalga oshirildi. Xususan, qishloq xo‘jaligi mahsulotlari yetishtirishni rivojlantirish borasida joriy yilda 600 gektar yer maydoni foydalanishga kiritildi.
O‘tgan davrda 45 km uzunlikda “XKS” xo‘jaliklararo kollektori, 19,4 km uzunlikdagi “Jana jap” kanali ikki tomonlama tozalandi. Mazkur maqsadlarga qariyb 2 mlrd so‘m mablag‘ sarflandi. Natijada tumandagi mavjud sug‘oriladigan ekin ekiladigan 4 ming gektar ekin yer maydonlari kafolatli suv bilan ta’minlandi. Foydalanishdan chiqib ketgan 2 ming 645 gektar yer maydonlari qayta foydalanishga kiritishga imkoniyat paydo bo‘lishiga erishildi. Mazkur ishlar bilan bir qatorda 10,0 ming gektar maydonning meliorativ holati yaxshilandi.
Shu bilan birga hozirda tumanda infratuzilmani rivojlantirish maqsadida tuman markaziy ko‘chalarida 3,5 kmlik salomatlik va piyodalar yo‘lagini qurish, “Parvoz” ovul fuqarolar yig‘inidagi bo‘sh turgan binoni 150 o‘rinli maktabgacha ta’lim tashkilotiga moslashtirish, markaziy stadionni rekonstruksiya qilish ishlari davom ettirilmoqda.
Yig‘ilishda davlatimiz rahbarining Qoraqalpog‘istonda mamlakatimiz tadbirkorlari bilan o‘tkazilgan uchrashuvida belgilab bergan vazifalaridan kelib chiqib, kelgusida amalga oshiriladigan ishlar yuzasidan kengashib olindi.
Viloyat hokimligi matbuot xizmati