Buxoro viloyati hokimligi

Bu boradagi prinsipial yondashuvlar mamlakatimizning investitsiyaviy jozibadorligini oshirib, sanoat ishlab chiqarishi, turizm va boshqa sohalarga toʻgʻridan-toʻgʻri sarmoyalar jalb qilish imkoniyatlarini yanada kengaytirmoqda. Ayni kunda qadimiy va hamisha navqiron shahrimizda mehmon boʻlib turgan bir qator xorijiy davlatlarning mamlakatimizdagi favqulodda va muxtor elchilari ishtirokida “Sahid Zarafshon” mehmonxonasida “Buxoro viloyatining investitsiya, eksport va turizm salohiyati” mavzuida boʻlib oʻtgan davra suhbati ham shu maqsadga xizmat qiladi. 

Saudiya Arabistoni, Qatar, Yaponiya, Koreya respublikasi, Chexiya, Gretsiya, Latviya, Rossiya, Turkmaniston, Ozarbayjon, Qozogʻiston, Tojikiston kabi davlatlarning yurtimizdagi favqulodda va muxtor elchilari, shuningdek, xalqaro tashkilotlar masʼul vakillari hozir boʻlgan anjumanni viloyat hokimi Botir Zaripov kirish soʻzi bilan ochib, yigʻilganlarga Buxoro viloyatining ayni kundagi iqtisodiy, investitsiyaviy va boshqa jabhalardagi salohiyati, chet el sarmoyadorlari uchun yaratilgan imkoniyatlar xususida atroflicha maʼlumot berdi.

Xususan, soʻnggi besh yilda tashqi savdo hajmi ikki baravar oshirilgan. Jumladan, 2025-yilda viloyatimizning xorijiy davlatlar bilan tashqi savdo aylanmasi 1,7 milliard AQSH dollarini tashkil etib, bunda eksport hajmi 414 million dollar va import hajmi 1,3 milliard dollarga yetkazilgani katta yutuq, albatta. Joriy yil oʻtgan 4 oyida esa viloyatimiz tashqi savdo aylanmasi 540 million AQSH dollarini tashkil etib, eksport hajmi 132 million dollar va import hajmi 408 million dollarga yetkazilgan. 

Viloyatimizda soʻngi 8 yilda xorijiy investitsiya ishtirokidagi korxona soni 5 baravarga oshib, turli sohalarda qoʻshma loyihalarni amalga oshirilishi natijasida bugunga kelib viloyatimizda 400 dan ortiq xorijiy investitsiya ishtirokidagi korxona faoliyat koʻrsatmoqda.

Quvonarlisi, soʻnggi yillarda mamlakatimizga, xususan, Buxoroga kelayotgan sayyohlar va mehmonlar soni jadal surʼatlar bilan ortmoqda. Mamlakatimiz Prezidenti tomonidan turizm sohasida amalga oshirilayotgan izchil islohotlar samarasida, ayniqsa, dunyoning 90 dan ortiq davlati uchun vizasiz rejim joriy etilgani samarasida soʻnggi 8 yilda Buxoroga tashrif buyurgan xorijlik sayyohlar soni sezilarli oshgan. Masalan, oʻtgan yilda tashrif buyurgan xorijiy sayyoh soni 3,5  million nafardan, mahalliy sayyoh soni esa 5 million nafardan oshiqni tashkil etdi.

Xorijiy davlatlarning mamlakatimizdagi favqulodda va muxtor elchilari, xalqaro tashkilotlar masʼul vakillari bilan samimiy ruhda kechgan muloqotda viloyat investitsiyalar, sanoat va savdo boshqarmasi boshligʻining oʻrinbosari Abdurasul Akramov, viloyat turizm boshqarmasi boshligʻining oʻrinbosari Bobir Toʻxsanovlar hudud iqtisodiy salohiyati, shuningdek, turizm sohasi rivojiga daxldor hisobotlarini taqdim etdilar. Bu toʻgʻridagi videoroliklar yigʻilganlar eʼtiboriga havola qilindi.

Anjumanda Yevropa Ittifoqining mamlakatimizdagi vakili Toyvo Kalar, shuningdek, Gretsiya, Latviya, Chexiya, Ruminiya hamda Turkmaniston respublikalarining  yurtimizdagi favqulodda va muxtor elchilari Paraskevi Tzeveliki, Girts Yaunzems, Lubomir Frebort va Shadurdi Meredov, Daniel Kristian Chobanular oʻz fikr-mulohazalarini bayon etib, yangi loyihalar istiqboliga katta ishonch bildirdilar. Ular davlatlarimiz oʻrtasidagi oʻzaro savdo-iqtisodiy, investitsiyaviy, madaniy-gumanitar, taʼlim va turizm sohalaridagi hamkorlikni yanada kengaytirishdan manfaatdor ekanliklarini taʼkidladilar. 

Viloyat hokimligi matbuot xizmati