“Og‘ir” toifadagi mahallalarda amalga oshiriladigan ishlar joyiga chiqib o‘rganildi
2026-07-07 17:45:00 / Yangiliklar
Bo‘stonliq tumani hokimining birinchi o‘rinbosari X.Abduyusupov, tuman hokimi o‘rinbosari A.Rixsitillayev hamda Respublika ishchi guruhi a’zolari tomonidan O‘zbekiston Respublikasi Prezidentining 2026-yil 5-fevraldagi PQ-49-son qarori ijrosi yuzasidan tumandagi “Sari-qangli”, “M.Boymurzayev”, “Bog‘chovul” va “Bog‘iston” mahalla fuqarolar yig‘inlarida amalga oshirilishi belgilangan ishlar joyiga chiqib o‘rganildi.
O‘rganish davomida mazkur mahallalarni kompleks rivojlantirish, muhandislik-kommunikatsiya infratuzilmasini yaxshilash, tadbirkorlikni qo‘llab-quvvatlash va aholi uchun qulay shart-sharoitlar yaratish bo‘yicha belgilangan vazifalar yuzasidan jamoatchilikka batafsil ma’lumot berildi. Shuningdek, mahalla faollari va fuqarolar tomonidan ilgari surilgan taklif hamda tashabbuslar muhokama qilinib, ularni amalga oshirish mexanizmlari ko‘rib chiqildi.
Shuningdek, aholi tomorqalaridan samarali foydalanish, yuqori daromad keltiruvchi ekin turlarini yetishtirish va daromad manbalarini kengaytirish borasidagi ilg‘or tajribalar ham o‘rganildi.
Mas’ul tashkilotlar va mahalla faollari ishtirokida har bir loyihaning amalga oshirish muddatlari, moliyalashtirish manbalari, ijrochi tashkilotlar hamda kutilayotgan natijalar muhokama qilindi. Belgilangan ishlarni sifatli va o‘z vaqtida bajarish maqsadida jamoatchilik nazoratini kuchaytirish bo‘yicha mahallalarda ishchi guruhlar tashkil etildi.
❗️Ma’lumot uchun: Bo‘stonliq tumanida 4 ta “og‘ir” toifadagi mahalla tanlab olinib, ularni kompleks rivojlantirish bo‘yicha manzilli dastur ishlab chiqilgan. Mazkur dastur doirasida mahallalar infratuzilmasini yaxshilash uchun 12 milliard so‘m mablag‘ ajratilishi belgilangan.
Qarorga asosan:
➖16,33 km ichki yo‘llarga asfalt qoplamasi yotqiziladi;
➖4,1 km piyodalar yo‘laklari barpo etiladi;
➖75 ta tungi yoritish chirog‘i o‘rnatiladi;
➖162 ta elektr ustuni yangilanadi;
➖9,3 km elektr tarmoqlari tortiladi;
➖2 ta transformator punkti yangilanadi.
Mazkur chora-tadbirlar natijasida mahallalarning muhandislik va ijtimoiy infratuzilmasi sezilarli darajada yaxshilanadi, aholi uchun yanada qulay yashash sharoitlari yaratiladi.
Shu bilan birga, tadbirkorlikni rivojlantirish, yangi ish o‘rinlarini yaratish, aholi bandligini ta’minlash, tomorqalardan samarali foydalanish va daromad manbalarini kengaytirish orqali ushbu mahallalarda ishsizlik hamda kambag‘allik darajasini keskin kamaytirish, ularni bosqichma-bosqich ishsizlik va kambag‘allikdan xoli hududlarga aylantirish ko‘zda tutilgan.