Bo‘stonliqda agrar sohani rivojlantirish masalasiga bag‘ishlangan muloqot o‘tkazildi
2026-06-05 19:05:00 / Yangiliklar
Bo‘stonliq tumanida viloyat hokimi Zoyir Mirzayev boshchiligida hududning agrar salohiyatini yanada oshirish, yangi ish o‘rinlari yaratish hamda foydalanilmayotgan yer maydonlarini iqtisodiy aylanmaga kiritish masalalariga bag‘ishlangan yig‘ilish bo‘lib o‘tdi.
Unda viloyat va tuman korxona-tashkilotlari rahbarlari, tadbirkorlar, tuman Kengashi deputatlari, fermerlar hamda jamoatchilik vakillari ishtirok etdi.
Yig‘ilishda “Navobod”, “Chimgan” va “G‘azalkent” mahalla fuqarolar yig‘inlari hududlarida tanlab olingan 3000 gektar yer maydonini o‘zlashtirish bo‘yicha istiqbolli loyiha muhokama qilindi.
Rejaga ko‘ra, 7 kilometr uzunlikdagi quvur orqali suv keltirish, zamonaviy sug‘orish tizimini yo‘lga qo‘yish hamda suv havzasini tashkil etish nazarda tutilgan.
Shuningdek, hududlarda sanoat usulida intensiv bog‘lar barpo etish, malina, funduk, qorag‘at, qulupnay va boshqa serdaromad rezavor ekinlarni yetishtirishni yo‘lga qo‘yish bo‘yicha takliflar ko‘rib chiqildi.
Ta’kidlanganidek, loyiha to‘liq amalga oshirilishi natijasida 1000 ta doimiy va qariyb 10 mingta mavsumiy ish o‘rni yaratiladi.
Muhokamalar davomida yer egalari, foydalanuvchilari va ijarachilar bilan ochiq muloqotlar o‘tkazilib, mavjud yer resurslaridan samarali foydalanish, hosildorlikni oshirish hamda aholi bandligini ta’minlashga qaratilgan takliflar ko‘rib chiqildi.
Shuningdek, rezavor ekinlar yetishtirish jarayonlarini tizimli tashkil etish, amalga oshirilayotgan ishlarni doimiy monitoring qilib borish hamda loyihaning samaradorligini ta’minlash yuzasidan ishchi guruh oldiga aniq topshiriqlar qo‘yildi.
Yig‘ilish yakunida belgilangan vazifalarni o‘z vaqtida va sifatli amalga oshirish, loyihani qisqa muddatlarda hayotga tatbiq etish bo‘yicha mutasaddi rahbarlarga tegishli ko‘rsatmalar berildi.