Bo‘stonliqda rezavor ekinlar yetishtirish va zamonaviy bog‘lar barpo etish masalalari ko‘rib chiqildi
2026-05-20 13:40:00 / Yangiliklar
O‘zbekiston Respublikasi Prezidentining PQ-229-son qarori hamda Vazirlar Mahkamasining tegishli qarorlari ijrosini ta’minlash maqsadida Toshkent viloyati hokimining birinchi o‘rinbosari Otabek Tursunov va tuman hokimi J.Axmedov boshchiligida yig‘ilish o‘tkazildi.
Unda viloyat va tuman korxona-tashkilotlari rahbarlari, tadbirkorlar, tuman Kengashi deputatlari, fermerlar hamda jamoatchilik vakillari ishtirok etdi.
Yig‘ilishda “Navobod”, “Chimgan” va “G‘azalkent” MFY hududlarida tanlab olingan 3000 gektar yer maydonini o‘zlashtirish masalalari muhokama qilindi. Loyihaga ko‘ra, 7 kilometr uzunlikdagi quvur orqali suv tortish, sug‘orish tizimini yo‘lga qo‘yish hamda suv havzasi tashkil etish rejalashtirilgan.
Shuningdek, hududlarda sanoat usulida zamonaviy bog‘lar barpo etish, malina, funduk, qorag‘at, qulupnay va boshqa serdaromad rezavor ekinlarni yetishtirishni yo‘lga qo‘yish bo‘yicha takliflar ko‘rib chiqildi. Ta’kidlanganidek, loyiha amalga oshirilishi natijasida 1000 ta doimiy hamda qariyb 10 mingta mavsumiy ish o‘rinlari yaratiladi.
Yig‘ilish davomida yer egalari, foydalanuvchilari va ijarachilar bilan muzokaralar olib borilib, mavjud yer maydonlaridan samarali foydalanishga qaratilgan takliflar muhokama qilindi. Belgilangan hududlarda rezavor ekinlarni yetishtirish va amalga oshirilayotgan ishlarni doimiy monitoring qilib borish maqsadida ishchi guruh tuzildi.
Yig‘ilish yakunida qarorlar ijrosini sifatli va o‘z vaqtida ta’minlash yuzasidan mutasaddi rahbarlarga tegishli topshiriqlar berildi.