“Kichiksoy” mahallasida yangi maktabgacha ta’lim muassasasi foydalanishga topshirildi
2026-03-31 16:25:00 / Yangiliklar
Bugun “Kichiksoy” MFY hududida joylashgan 23-sonli davlat maktabgacha ta’lim tashkiloti qayta rekonstruksiya qilinib, tantanali ravishda foydalanishga topshirildi.
Ochilish marosimida Respublika ishchi guruhi a’zolari, tuman hokimi o‘rinbosari J.Ortiqboyev, tuman maktabgacha va maktab ta’limi bo‘limi boshlig‘i I.Izzatulloyev, mahalla faollari, sohaga mas’ul mutasaddilar hamda keng jamoatchilik vakillari ishtirok etdi.
Tadbirda so‘zga chiqqanlar tomonidan yurtimizda ta’lim sohasiga, xususan maktabgacha ta’lim tizimiga qaratilayotgan yuksak e’tibor alohida ta’kidlandi.
Investitsiya dasturi doirasida qayta rekonstruksiya qilingan mazkur ta’lim maskani endilikda 120 nafar (ilgari 90 o‘rinli) bolani qamrab olish imkoniyatiga ega bo‘ldi. Shu bilan birga, muassasada qo‘shimcha yangi ish o‘rinlari yaratildi.
Zamonaviy talablarga mos ravishda jihozlangan bog‘chada bolalarning har tomonlama rivojlanishi uchun barcha zarur sharoitlar yaratilgan. Mazkur maskan nafaqat ta’lim sifatini oshirish, balki hududdagi yosh oilalar uchun ham qulay imkoniyatlar yaratadi.
Yangi ta’lim muassasasining foydalanishga topshirilishi hududda maktabgacha ta’lim qamrovini kengaytirish yo‘lidagi muhim qadamlardan biri bo‘ldi.