Assalomu alaykum, aziz va qadrli yoshlar!

Siz, azizlarni mamlakatimiz hayotidagi qutlug‘ ayyom – Yoshlar kuni bilan chin qalbimdan muborakbod etaman.

Biz o‘z oldimizga qo‘ygan ulkan maqsadlarimiz ro‘yobini, Yangi O‘zbekiston kelajagini butun el-yurtimiz qatori sizdek azmu shijoatli farzandlarimiz bilan bog‘liq holda ko‘ramiz. Shu bois, yoshlarning huquq va manfaatlarini ta’minlash, ularni har tomonlama kamol toptirish davlatimiz siyosatining eng ustuvor yo‘nalishlaridan biri sifatida doimo e’tiborimiz markazida bo‘lib kelmoqda. Bu haqda so‘z yuritganda, so‘nggi yillarda yurtimizda yoshlar bilan ishlash bo‘yicha dunyoda o‘xshashi kam bo‘lgan vertikal boshqaruv tizimi yaratilganini alohida ta’kidlash lozim.

Bu esa mahallalardagi Prezident vakillari bo‘lgan yoshlar yetakchilari orqali qancha-qancha yigit-qizlarni kasb-hunarga o‘qitish, ularning bandligini ta’minlash, bo‘sh vaqtini mazmunli tashkil etish va ijtimoiy qo‘llab-quvvatlash bilan bog‘liq ko‘plab masalalarni quyi bo‘g‘inning o‘zida hal etish imkonini bermoqda.

Ayniqsa, “Yoshlar daftari” hamda “Yoshlar balansi” platformasi asosida amalga oshirilayotgan keng ko‘lamli ishlarimiz natijasini o‘g‘il-qizlarimiz o‘z hayotida yaqqol his etmoqda.

Qadrli o‘g‘il-qizlarim!

Yoshlar – har qanday millat va davlatning kelajagi, taraqqiyoti va ertangi kunini belgilab beruvchi buyuk kuchdir. Bugun mamlakatimizda yoshlarning bilim olishi, kasb-hunar egallashi, o‘z iqtidorini namoyon qilishi va munosib hayot kechirishi uchun keng imkoniyatlar yaratilmoqda. Bu e’tibor va g‘amxo‘rlikning asosiy maqsadi – Vatanimiz kelajagini bilimli, tashabbuskor va vatanparvar yoshlar qo‘lida yanada yuksaltirishdir.

Tumanimiz yoshlari ham ilm-fan, sport, madaniyat va tadbirkorlik sohalarida munosib natijalarga erishib, yurtimiz ravnaqiga o‘z hissasini qo‘shib kelmoqda. Turli tanlov va musobaqalarda qo‘lga kiritilayotgan yutuqlar, yangi g‘oya va tashabbuslar har birimizga g‘urur va iftixor bag‘ishlaydi.

Albatta, yoshlarning mavjud imkoniyatlardan unumli foydalanib, turli sohalarda muhim yutuqlarga erishayotgani barchamizni quvontiradi.

2026-yilda 8 nafar yoshimiz sportning turli yo‘nalishlari bo‘yicha xalqaro va respublika musobaqalari g‘olibiga aylandi. Shuningdek, 7 nafar yoshimiz ta’lim va madaniyat yo‘nalishlarida o‘tkazilgan respublika ko‘rik-tanlovlarining sovrindori bo‘ldi.

Joriy o‘quv yilida maktablarimizni bitirgan yoshlarning 11 nafari oltin, 3 nafari esa kumush medal bilan taqdirlandi. Yana 36 nafar yoshimiz muddatidan oldin talabalik baxtiga muyassar bo‘ldi.

Birgina Bo‘ka ixtisoslashtirilgan maktabi o‘quvchisi Yo‘ldosheva Nihola Muhiddin qizining Xalqaro 15-qizlar matematika olimpiadasida yuksak natijaga erishib, bronza medalini qo‘lga kiritgani, tumanimiz sha’ni va mamlakatimiz nufuzini xalqaro maydonda munosib himoya qilgani barchamizda faxr tuyg‘usini uyg‘otdi.

2026-yilda sportning futbol va mini-futbol turlari bo‘yicha an’anaviy tarzda o‘tkazilayotgan Davlat xavfsizlik xizmati kubogi musobaqalarida Yangi hayot mahallasi yoshlari viloyat bosqichida g‘oliblikni qo‘lga kiritib, respublika bosqichiga yo‘llanmani qo‘lga kiritdilar.

Aziz yoshlar!

Farzandlari bilimli, iste’dodli, o‘z kuchi va salohiyatiga ishonadigan, doimo oldinga intilib yashaydigan xalq va davlatning istiqboli, albatta, porloq bo‘ladi. Biz yoshlarimizni ana shunday ezgu fazilatlar sohiblari etib tarbiyalash uchun bor kuch va imkoniyatlarimizni safarbar etamiz.

Hech qachon unutmang, sizlar yoshlikning har bir daqiqasini g‘animat bilib, doimo bunyodkorlik va ijodkorlik ruhi bilan, Vatanga cheksiz mehr va sadoqat tuyg‘usi ila yashasangiz, albatta, kam bo‘lmaysiz.

Sizlarni bugungi bayram bilan yana bir bor samimiy tabriklab, oldingizga qo‘ygan ezgu maqsadlaringizga erishishda barchangizga mustahkam sog‘lik, baxt-saodat, omad va ulkan zafarlar tilayman.

Bayramingiz muborak bo‘lsin, aziz yoshlar!