Toshkent viloyati Bo'ka tumani hokimligi

Davlatimiz Rahbarining mahallalarga Yangi O‘zbekiston qiyofasini olib kirish, chekka hududlardagi mahallalarda “Zamonaviy mahalla markazlari”ni tashkil etish haqidagi topshiriqlari ijrosini ta’minlash maqsadida Bo‘ka tumanidagi og‘ir toifaga kiritilgan “Qo‘ldoshtepa” va “Navobod” mahallalarida amalga oshirilgan keng ko‘lamli bunyodkorlik ishlari yakunlanib, yangi obyektlar foydalanishga topshirildi.

Joriy yilning 18-fevral kuni ushbu ikki mahallaning tantanali ochilish marosimi bo‘lib o‘tdi.

Tadbirda viloyat va tuman mutasaddi rahbarlari, mahalla faollari, deputatlar, nuroniy otaxonu-onaxonlar, yoshlar hamda keng jamoatchilik vakillari ishtirok etdi.

Bo‘ka tumanidagi bu ikki mahallada 2025-yil sentyabr – 2026-yil yanvar oylari davomida amalga oshirilgan keng ko‘lamli bunyodkorlik va ijtimoiy-iqtisodiy islohotlar natijasida mahalla yangicha qiyofa aks etdi.

Mazkur ishlar Respublika ishchi guruhi tomonidan mutasaddi vazirlik va idoralar, Toshkent viloyati hokimligi hamda prokuratura organlari bilan hamkorlikda amalga oshirildi.

Ma’lumot uchun:

1) “Qo‘ldoshtepa” mahallasida – 731 ta xonadonda 903 ta oila, jami 3 360 nafar aholi istiqomat qiladi.

Hududda “Zamonaviy mahalla markazi”, “Nuroniylar maskani”, yangi kutubxona, tikuvchilik va kasb-hunarga ixtisoslashgan o‘quv markazi barpo etildi. Mavjud tibbiyot punkti to‘liq ta’mirlanib, zamonaviy jihozlar bilan ta’minlandi, 2 ta oilaviy bog‘cha tashkil etildi. Natijada 95 nafar bola maktabgacha ta’lim bilan qamrab olindi va 8 nafar ayol doimiy ish o‘rniga ega bo‘ldi.

Mahallada 14 km ichimlik suvi tarmog‘i tortildi, barcha xonadon toza ichimlik suvi bilan ta’minlandi. 3,2 km markaziy ko‘cha asfaltlashtirildi, ichki ko‘chalar shag‘allashtirildi, piyodalar yo‘laklari barpo etildi.

Elektr ta’minoti tizimi to‘liq modernizatsiya qilindi: 390 ta eski simyog‘och beton ustunlarga almashtirildi, 9 km SIP kabeli tortildi, yangi transformatorlar o‘rnatildi va tungi yoritish tizimi yangilandi. Tabiiy gaz tarmoqlari ta’mirlandi.

Shuningdek, kanal bo‘yida sport yo‘lagi, bolalar sport maydonchasi va “Workout” maydoni qurildi. “Yashil makon” umummilliy loyihasi doirasida jami 1 870 tup manzarali va mevali ko‘chatlar ekildi.

Bundan tashqari, hududdagi zovur tozalandi va atrofi tekislanib, 700 dan ortiq mevali va manzarali ko‘chatlar ekildi hamda ushbu ekin maydonlari aholiga foydalanish uchun biriktirib berildi.

Hududdagi “Oq jangal” qabristoni obodonlashtirildi, kirish yo‘llari shag‘allashtirildi va elektr chiroqlari o‘rnatildi, atrofi 250 metr uzunlikdagi beton devorlar bilan o‘raldi.

“Obod xonadon” mezonlarini joriy etish yo‘nalishida 569 ta xonadonning hovlilari chiqindilardan tozalandi, 251 tasining tashqi devorlari va 25 tasining darvozasi hamda 19 tasining tom qismlari ta’mirlandi, 36 tasining atrofi jami 2800 metr uzunlikdagi zamonaviy devor (yevrozabor) bilan o‘raldi.

Bundan tashqari, 71 ta oilaning uy-joylarida 235 mln. so‘mlik ta’mirlash ishlari olib borildi, 15 tasiga jami 32 mln. so‘mlik mebel jihozlari (shkaf, stol, stul) yetkazib berildi.

Ishsizlik va kambag‘allikni qisqartirish yo‘nalishida:

1) mahallada 4 marotaba mehnat yarmarkalari tashkil etildi va natijada 21 nafar kambag‘al oilalarning a’zolari doimiy ish bilan ta’minlandi.

2) ijara asosida yer maydonlari ajratilgan 27 nafar yoshlar nomiga dehqon xo‘jaliklari rasmiylashtirildi.

3) Oilaviy tadbirkorlikni rivojlantirish dasturi doirasida 33 ta xonadonga chorvachilik va qishloq xo‘jaligi yo‘nalishidagi asbob-uskunalar ajratildi va natijada ularning daromadlari ko‘tarilishi ta’minlanib, “Ijtimoiy himoya yagona reyestri” ro‘yxatidan chiqarildi.

4) tijorat banklari tomonidan 17 nafar fuqaroga tadbirkorlik faoliyatini boshlashi uchun 350 mln. so‘m kredit mablag‘lari ajratildi.

5) og‘ir ahvoldagi 3 ta oilaning tomorqasida 8 sotix yer maydonida issiqxonalar barpo etildi.

6) ishsiz xotin-qizlarni doimiy ish bilan ta’minlash maqsadida mahalla markazida “tikuv sexi” tashkil qilindi.

7) 45 ta xonadonning tomorqasini oqar suv bilan ta’minlash maqsadida ariqlar va 1,3 km. uzunlikdagi kollektor zovurlar qazildi, 250 ta xonadonning tomorqa yerlari haydab berildi.

8) 85 ta xonadonning tomorqalariga jami 3000 ta mevali hamda 200 ta xonadon tomorqasiga 7000 dan ortiq terak qalamchalari va ko‘chatlar ekildi.

9) 250 ta xonadonning tomorqalaridan samarali foydalanish va daromadlarini oshirish maqsadida pomidor, bulg‘or qalampiri, bodring kabi turli sabzavot ko‘chatlari ekildi, shuningdek tomorqa yer egalari uchun seminarlar o‘tkazildi.

Ushbu yo‘nalishda amalga oshirilgan ishlar natijasida mahallada kambag‘allik darajasi 4,4 foizdan 3 foizga, ishsizlik darajasi 6,3 foizdan 3,6 foizga kamaydi.
 

Aholini ijtimoiy qo‘llab-quvvatlash yo‘nalishida:

1) viloyat sog‘liqni saqlash boshqarmasining malakali mutaxassislari tomonidan mahalla aholisi uchun chuqurlashtirilgan tibbiy ko‘rik tashkil etildi.

Tibbiy ko‘rik natijalariga ko‘ra, 198 nafar fuqaroda turli kasalliklar aniqlanib, ularning 180 nafari ambulatoriya sharoitida va 12 nafari viloyat tibbiyot muassasalarida davolanishlari ta’minlandi, 6 nafariga pensiya tayinlanishida amaliy yordamlar ko‘rsatildi.

2) mahalladagi og‘ir ahvoldagi oilalarning 37 nafar farzandlari umumta’lim maktablaridagi turli to‘garaklarga jalb etildi.

3) 21 nafar voyaga yetmaganlar majburiy ta’limga jalb etildi, 2 nafar talabaning kontrakt to‘lovlari to‘lab berildi, 13 nafariga tug‘ilganlik haqidagi guvohnomani rasmiylashtirib berishda amaliy yordamlar ko‘rsatildi, 35 nafar kambag‘al oila farzandlari qishki va yozgi kiyim bilan ta’minlandi.

4) viloyat prokuraturasi, “Nuroniy” jamg‘armasi, Ma’naviyat va ma’rifat markazi, Yoshlar ishlari agentligi hamkorligida “Uch avlod” uchrashuvi o‘tkazildi va unga jami 300 nafar aholi jalb etildi.

5) mahallada yoshlar, xotin-qizlar va nuroniylar o‘rtasida ularning ijtimoiy faolliklarini oshirish maqsadida 200 nafardan ziyod yoshlar, xotin-qizlar va nuroniylar o‘rtasida sport tadbiri o‘tkazildi.

6) mahallaning ixtisoslashuvidan kelib chiqib, hududda veterinariya shoxobchasi hamda qoramollarni sun’iy urug‘lantirish maskani tashkil qilindi.

Yuqoridagi ishlarni bajarish uchun byudjet va homiylik mablag‘lari hisobidan jami 6 mlrd 154,5 mln so‘m sarflandi.

2) “Navobod” mahallasida – 658 ta xonadonda 1 119 ta oila, jami 3 646 nafar aholi istiqomat qiladi.

I. Infratuzilmani yaxshilash yo‘nalishida:

1) mahalla idorasi va mavjud tibbiyot punkti rekonstruksiya qilindi hamda ularning yonida kutubxona va ayvon qurib bitkazildi, shuningdek xotin-qizlarni tikuvchilikni o‘rgatishga ixtisoslashgan markaz tashkil etildi.

2) savdo do‘konlari va xizmat ko‘rsatish maskanlaridan iborat “Zamonaviy mahalla markazi”, shuningdek mahalla ixtisoslashuv drayveridan kelib chiqqan xolda veterinariya shoxobchasi tashkil qilindi hamda uni yonida sigirlar va qochirish yoshidagi g‘unajinlarni sun’iy urug‘lantirish maskani barpo etildi.

3) yopiq mini-futbol maydonchasi (“Navobod arena”), bolalar sport maydonchasi, basketbol va voleybol maydonchalari hamda va "Workout” maydoni qurib bitkazildi.
 

4) ichki ko‘chalarning jami 2,0 km qismi asfaltlashtirildi, 1.7 km qismi shag‘allashtirildi, hashar yo‘li orqali 2,0 km uzunlikdagi piyodalar yo‘lagi qurib bitkazildi.

5) yaroqsiz holatdagi jami 125 ta elektr simyog‘och beton ustunlarga almashtirildi, 4 km uzunlikdagi SIP kabellari tortildi, 30 ta tungi yoritish chiroqlari, 1 ta yangi transformator o‘rnatildi va 1 tasi ta’mirlandi.

6) “Yashil makon” umummilliy loyihasi doirasida jami 6 000 tup manzarali va mevali daraxt ko‘chatlari ekildi.

Bundan tashqari, hududdagi zovur tozalandi va atrofi tekislanib, 1 ta ko‘prik qurildi hamda 1 ta ichimlik suvi qudug‘i qazildi.

7) mahalla hududidagi “Istashom” va “Valig‘on” qabristonlari obodonlashtirildi va elektr chiroqlari o‘rnatildi, atroflari jami 1,1 km uzunlikdagi beton devorlar bilan o‘raldi.

8) “Obod xonadon” mezonlarini joriy etish yo‘nalishida 550 ta xonadonning hovlilari chiqindilardan tozalandi, 529 tasining tashqi devorlari va 200 tasining tom qismlari ta’mirlandi.

Bundan tashqari, 2 ta kam ta’minlangan oilaning uy-joylarini ta’mirlashga ko‘maklashildi, 10 tasiga mebel jihozlari (shkaf, stol, stul) yetkazib berildi.

10) “Toza hudud” DM tomonidan mahallada chiqindilarni kunlik olib ketish tizimi yo‘lga qo‘yildi.

II. Ishsizlik va kambag‘allikni qisqartirish yo‘nalishida:

1) mahallada 2 marotaba mehnat yarmarkalari tashkil etildi va natijada 9 nafar fuqaro doimiy ish bilan ta’minlandi.

2) ijara asosida yer maydonlari ajratilgan 7 nafar yoshlar nomiga dehqon xo‘jaliklari rasmiylashtirildi.

3) Oilaviy tadbirkorlikni rivojlantirish dasturi doirasida ajratilgan imtiyozli kreditlar hisobiga 17 ta xonadonga tomorqa yer maydonlariga urug‘lar ajratildi.

4) 3 ta oilaning tomorqasida 7 sotix yer maydonida issiqxonalar barpo etildi.

5) 170 ta xonadonning tomorqasini oqar suv bilan ta’minlash maqsadida 3 ta vertikal quduq qazildi va ularga quyosh panellari o‘rnatildi.

6) 250 ta xonadonning tomorqalaridan samarali foydalanish va daromadlarini oshirish maqsadida ushbu yer maydonlariga pomidor, bulg‘or qalampiri, bodring kabi turli sabzavot ko‘chatlari ekildi, shuningdek tomorqa yer egalari uchun seminarlar o‘tkazildi.

Amalga oshirilgan ishlar natijasida mahallada kambag‘allik darajasi 3,2 foizdan 1 foizga kamaydi, ishsizlik darajasi 3 foizdan 0 foizga tushdi (mahalla ishsizlikdan xoli hududga aylandi).
 

III. Aholini ijtimoiy qo‘llab-quvvatlash yo‘nalishida:

1) viloyat sog‘liqni saqlash boshqarmasining malakali mutaxassislari tomonidan mahalla aholisi uchun chuqurlashtirilgan tibbiy ko‘rik tashkil etildi.

Tibbiy ko‘rik natijalariga ko‘ra, 304 nafar fuqaroda turli kasalliklar aniqlanib, ularning 256 nafari ambulatoriya sharoitida va 7 nafari viloyat va tuman, 1 nafari esa respublika tibbiyot muassasalarida davolanishlari tashkillashtirildi.

2) mahalladagi og‘ir ahvoldagi oilalarning 19 nafar farzandlari umumta’lim maktablaridagi turli to‘garaklarga jalb etildi.

3) 12 nafar kambag‘al oila farzandlari qishki va yozgi kiyim bilan ta’minlandi, 22 ta oilaga moddiy yordamlar va 12 tasiga oziq-ovqat mahsulotlari taqdim etildi.

4) viloyat prokuraturasi, “Nuroniy” jamg‘armasi, Ma’naviyat va ma’rifat markazi, Yoshlar ishlari agentligi hamkorligida “Uch avlod” uchrashuvi o‘tkazildi va unga jami 200 nafar aholi jalb etildi.

5) mahallada yoshlar, xotin-qizlar va nuroniylar o‘rtasida ularning ijtimoiy faolliklarini oshirish maqsadida 320 nafar yoshlar, xotin-qizlar va nuroniylar o‘rtasida sport tadbiri o‘tkazildi.

Yuqoridagi ishlarni bajarish uchun jami 5 mlrd 317 mln so‘m (shundan, 2 mlrd 886 mln so‘m byudjet, 431 mln so‘m “Mahalla” fondi, 2 mlrd so‘m homiylik mablag‘lari) sarflandi.

Tadbir doirasida aholi bilan uchrashuvlar, nuroniylar bilan samimiy suhbatlar tashkil etildi. Shuningdek, yig‘ilganlar ishtirokida ko‘chat ekish aksiyasi, sport marafoni hamda bayram tadbirlari ko‘tarinki kayfiyatda o‘tkazildi.

Mahalladagi bunyodkorlik ishlarida fidoiylik ko‘rsatgan mas’ullar va mahalla faollari esdalik sovg‘alari bilan munosib taqdirlandi

PRESS-RELIZNI YUKLAB OLISH UCHUN BU YERGA BOSING.