Aholi va qishloq xo‘jaligini ro‘yxatdan o‘tkazish bo‘yicha o‘quv seminari tashkil etildi
2025-12-02 14:30:00 / Yangiliklar
Bugun, 19-sonli Bolalar musiqa va san’at maktabi zalida “Aholini va qishloq xo‘jaligini ro‘yxatdan o‘tkazish” mavzusida o‘quv seminari bo‘lib o‘tdi. Mazkur seminar aholini va qishloq xo‘jaligi subyektlarini ro‘yxatga olish jarayonlariga puxta tayyorgarlik ko‘rish, joylarda olib boriladigan ishlar samaradorligini oshirish maqsadida tashkil etildi.
Tadbirda “mahalla yettiligi” tarkibiga kiruvchi mas’ullar, tegishli tashkilot va idoralar vakillari ishtirok etdi.
Seminar davomida 2026-yilda o‘tkazilishi rejalashtirilgan aholini va qishloq xo‘jaligini ro‘yxatga olish tadbirlarining mazmun-mohiyati, ro‘yxatga olishning huquqiy asoslari, jarayonning bosqichlari hamda hududlarda amalga oshiriladigan amaliy chora-tadbirlar yuzasidan atroflicha tushuntirishlar berildi. Shuningdek, aholiga ro‘yxatga olishning ahamiyatini yetkazish, axborot-tushuntirish ishlarini samarali tashkil etish, yuzaga kelishi mumkin bo‘lgan muammolarni o‘z vaqtida aniqlash va bartaraf etish masalalariga alohida e’tibor qaratildi.
Tadbir yakunida ishtirokchilar tomonidan berilgan savollarga mutaxassislar tomonidan batafsil javoblar berildi hamda kelgusida amalga oshiriladigan vazifalar bo‘yicha tegishli tavsiyalar bildirildi.
Mazkur o‘quv seminar aholini va qishloq xo‘jaligini ro‘yxatga olish jarayonlarini sifatli va belgilangan tartibda tashkil etishga xizmat qilishi ta’kidlandi.