Toshkent viloyati Bekobod shahar hokimligi

Davlatimiz rahbari — Shavkat Mirziyoyev tashabbusi bilan yurtimizda “Yashil makon” umummilliy loyihasi izchil va tizimli ravishda amalga oshirib kelinmoqda. Mazkur loyiha nafaqat bugungi kun, balki kelajak avlod taqdiri, ekologik barqarorlik va sog‘lom turmush muhiti uchun xizmat qilayotgan keng qamrovli umumxalq harakatidir.

M U R O J A A T

Hurmatli mahalla faollari, nuroniylar, yoshlar va aziz shahrimiz aholisi!

Ma’lumki, “Yashil makon” umummilliy loyihasi yurtimizda ekologik muhitni yaxshilash, aholi yashash hududlarini obod va ko‘rkam etish, iqlim o‘zgarishining salbiy ta’sirini kamaytirish hamda kelajak avlod uchun sog‘lom va musaffo atrof-muhit yaratishga qaratilgan strategik ahamiyatga ega tashabbusdir.

Bugun har bir mahallada daraxt va manzarali ko‘chatlar ekish, mavjud yashil hududlarni asrab-avaylash, sug‘orish tizimlarini tartibga keltirish, ichki ko‘chalar va jamoat joylarini obodonlashtirish ishlari ustuvor vazifaga aylanmoqda. Ayniqsa, ekilgan nihollarni parvarishlash, ularning to‘liq ko‘karib ketishini ta’minlash masalasiga alohida e’tibor qaratishimiz zarur. Zero, natija faqat ekish bilangina emas, balki doimiy g‘amxo‘rlik va mas’uliyat bilan belgilanadi.

Shu bilan birga, joriy yil bahor mavsumida “Tomorqadan samarali foydalanish oyligi”ni yuqori saviyada tashkil etish ham muhim ahamiyat kasb etadi. Tomorqachilik — oilalar daromadini oshirish, ichki bozorlarimizni arzon va sifatli mahsulotlar bilan ta’minlash, aholi bandligini mustahkamlash hamda oziq-ovqat xavfsizligini ta’minlashda eng samarali yo‘nalishlardan biridir.

Har bir xonadonda mavjud yer maydonidan oqilona va unumli foydalanish, sabzavot-poliz ekinlari, mevali daraxt va tok ko‘chatlari ekish, kichik issiqxonalar tashkil etish, tomorqalarni sug‘orish va parvarishlash ishlarini tizimli yo‘lga qo‘yish bugunning dolzarb vazifasidir. Bu borada mahalla yettiligi, faollar hamda tajribali nuroniylar o‘zaro hamkorlikda amaliy ko‘mak ko‘rsatishlari maqsadga muvofiqdir.

Shahrimiz mahallalarida bahorgi mavsumda keng ko‘lamli ko‘chat ekish, ichki ko‘chalar, qabristonlar, ijtimoiy soha obyektlari atroflarini obodonlashtirish, ariq-zovurlarni tozalash, sug‘orish tizimlarini yaxshilash bilan bir qatorda, tomorqalardan samarali foydalanish bo‘yicha targ‘ibot va amaliy ishlarni kuchaytirish zarur. 

Aziz hamshaharlar!

Har bir ekilgan nihol — kelajakka qo‘yilgan mustahkam qadamdir.
Har bir parvarishlangan daraxt — farzandlarimiz uchun sof havo va sog‘lom hayot kafolatidir.
Har bir obod tomorqa esa — oilamiz farovonligi va dasturxonimiz to‘kinligining mustahkam manbaidir.

Bugun ekologik madaniyatni yuksaltirish, yashil hududlarni kengaytirish va tomorqachilikni rivojlantirish faqat davlat organlarining emas, balki har birimizning fuqarolik burchimizdir. Mahalla — hamjihatlik va birdamlik maskani. Aynan mahalladan boshlangan ezgu tashabbus butun shahrimiz qiyofasini o‘zgartiradi.

Shu bois barchangizni “Yashil makon” umummilliy loyihasi hamda “Tomorqadan samarali foydalanish oyligi” doirasidagi umumxalq harakatida faol ishtirok etishga, har bir xonadon, har bir ko‘cha va har bir mahallani yanada obod, fayzli va yashil maskanga aylantirishga chorlab qolaman.

Birgalikdagi sa’y-harakatlarimiz bilan  shahrimizni yanada ko‘rkam, yashil, ekologik barqaror va farovon hududga aylantirishimizga ishonaman.

Keling, birlashaylik — shahrimiz yanada yashil va obod bo‘lsin!