Jamiyatda maromiylik madaniyatini keng targ‘ib etishga qaratilgan uchrashuv bo‘lib o‘tdi
2025-11-04 13:45:00 / Yangiliklar
Bekobod tuman hokimligida mas’ullar ishtirokida jamiyatda maromiylik madaniyatini keng targ‘ib etishga bag‘ishlangan uchrashuv bo‘lib o‘tdi.
Tadbir davomida to‘y-hasham va ortiqcha isrofgarchilikning oldini olish, sog‘lom ma’naviy muhitni mustahkamlash masalalari atroflicha muhokama qilindi. Ishtirokchilar tomonidan jamiyatda dabdababozlik, ortiqcha xarajatlar, oilaviy tadbirlarda me’yorni saqlamaslik kabi salbiy holatlar tez-tez uchrab turayotgani ta’kidlandi.
Qayd etilishicha, bunday holatlar nafaqat aholining ijtimoiy-iqtisodiy manfaatlariga zarar yetkazadi, balki milliy qadriyatlarimiz va ma’naviy an’analarimizga zid kayfiyat shakllanishiga ham sabab bo‘lmoqda.
Uchrashuv yakunida Oila va xotin-qizlar bo‘limi, O‘zbekiston mahallalari uyushmasi tuman bo‘limi, Nuroniylar jamg‘armasi tuman bo‘limi, O‘zbekiston musulmonlari idorasi Bekobod tuman vakilligi hamda Respublika Ma’naviyat va ma’rifat markazi Bekobod tuman bo‘limi o‘rtasida “Maromiylik marafoni” doirasida chora-tadbirlar dasturi imzolandi.
Ta’kidlash joizki, O‘zbekiston Respublikasi Vazirlar Mahkamasining 2025-yil 16-sentyabrda qabul qilingan “Umumiy ovqatlanish korxonalarida hosil bo‘ladigan oziq-ovqat chiqindilaridan samarali foydalanish va ularning atrof-muhitga salbiy ta’sirini kamaytirish hamda ortiqcha isrofgarchiliklarning oldini olish chora-tadbirlari to‘g‘risida”gi qarori mazkur yo‘nalishda muhim dasturilamal hujjat bo‘lib xizmat qilmoqda.
Mazkur qaror asosida jamiyatda maromiylik madaniyatini shakllantirish, fuqarolarda me’yorni saqlash, ortiqcha isrofgarchilikdan tiyilish, shukronalik va bag‘rikenglik kabi yuksak insoniy fazilatlarni hayot mezoniga aylantirish, natijada esa jamiyatda totuvlik, hamjihatlik va ma’naviy barqarorlikni ta’minlashga qaratilgan qator vazifalar belgilangan.