Toshkent viloyati Bekobod tumani hokimligi

30-iyun — Yoshlar kuni munosabati bilan Bekobod tumanida ko‘tarinki ruhdagi bayram tadbiri tashkil etildi. Tadbir yoshlarni e’tirof etish, ularning yutuqlarini rag‘batlantirish hamda jamiyatdagi faolligini yanada oshirishga qaratilgani bilan ahamiyatli bo‘ldi. Bayram tadbirida Bekobod tumani hokimi ishtirok etib, barcha yoshlarni samimiy qutladi hamda ularga kelgusi faoliyatlarida ulkan muvaffaqiyatlar tiladi. Shuningdek, yoshlar erishayotgan natijalar yurt taraqqiyoti va kelajagi uchun muhim omil ekanini ta’kidladi. Tadbir davomida 2025–2026-o‘quv yilida umumiy o‘rta ta’lim muassasalarini 2 438 nafar bitiruvchi tamomlagani, ulardan 27 nafari muddatidan oldin oliy ta’lim muassasalariga talabalikka qabul qilingani alohida e’tirof etildi. Bundan tashqari, maktabni 47 nafar oltin va 7 nafar kumush medal bilan tamomlayotgan o‘quvchilar tantanali ravishda taqdirlandi. Shuningdek, umumta’lim maktablari o‘quvchilari o‘rtasida matematika, ingliz tili va informatika fanlari bo‘yicha o‘tkazilgan “Hokim olimpiadasi” hamda “IT Bilimdoni” tanlovlari g‘oliblari ham munosib rag‘batlantirildi. Ularning bilim va salohiyati Bekobod yoshlari intellektual imkoniyatlarining yorqin namunasi ekani qayd etildi. Bayram tadbirida tumanda 2026-yil davomida turli sohalarda samarali faoliyat yuritib kelayotgan eng faol yosh xodimlar ham e’tirof etilib, faxriy yorliq va esdalik sovg‘alari bilan taqdirlandi. Shu o‘rinda, 27-iyun — Matbuot va ommaviy axborot vositalari xodimlari kuni munosabati bilan bir guruh jurnalistlar, matbuot xodimlari hamda blogerlarga kasb bayrami munosabati bilan ehtirom ko‘rsatildi. Ularning jamiyat hayotidagi dolzarb voqealarni yoritish, aholining axborotga bo‘lgan ehtiyojini ta’minlashdagi xizmatlari alohida qayd etildi. Tadbirning ikkinchi qismi tuman markaziy o‘yingohida davom etdi. Bayram konsert dasturida tumanning iste’dodli yosh san’atkorlari hamda taniqli estrada yulduzlari ishtirok etib, Vatan, tinchlik, do‘stlik va yoshlikni madh etuvchi kuy-qo‘shiqlarni ijro etdilar. Turli madaniy chiqishlar, sahna ko‘rinishlari va ko‘ngilochar dasturlar ishtirokchilarga unutilmas bayramona kayfiyat ulashdi. Yoshlar kuni munosabati bilan tashkil etilgan mazkur tadbir yoshlarning madaniy hordiq chiqarishi, o‘z iste’dod va salohiyatini namoyon etishi, shuningdek, jamiyat hayotidagi faolligini yanada oshirishga xizmat qildi. Yoshlar — Yangi O‘zbekiston bunyodkorlari! Bekobod yoshlari esa o‘z bilimlari, tashabbuslari va yutuqlari bilan bu ishonchni amalda namoyon etib kelmoqda.