Toshkent viloyati Bekobod tumani hokimligi

Bugungi kunda qishloq xo‘jaligi sohasida hosildorlikni oshirish, agrotexnik tadbirlarni o‘z vaqtida va sifatli amalga oshirish hamda ekinlarning fitosanitar holatini yaxshilash muhim vazifalardan biri hisoblanadi. Bekobod tumani hududidagi paxta maydonlarida g‘o‘za parvarishida mavjud kamchiliklarni aniqlash va ularni bartaraf etish masalalariga bag‘ishlangan o‘quv-amaliy seminar tashkil etildi. Unda fermer xo‘jaliklari rahbarlari, agronomlar hamda O‘simliklar karantini va himoyasi agentligining Bekobod tumani bo‘limi mutaxassislari ishtirok etdi. Seminar davomida paxta dalalarida olib borilgan kuzatuvlar asosida aniqlangan muammolar atroflicha muhokama qilindi. Jumladan, ayrim maydonlarda qator oralari ishlovini o‘z vaqtida o‘tkazish, sug‘orish va oziqlantirish tadbirlarini belgilangan muddatlarda amalga oshirish, begona o‘tlar hamda zararkunandalarga qarshi kurash choralarini kuchaytirish bo‘yicha tavsiyalar berildi. Tadbirning amaliy qismida Xitoylik agronom-mutaxassis tomonidan Xitoy navli g‘o‘zalarni parvarishlash bo‘yicha ilg‘or tajribalar taqdim etildi. Unda o‘simlik rivojlanish bosqichlariga mos oziqlantirish, namlikni me’yorlashtirish, qator oralari yumshoqligini saqlash hamda hosil elementlarini asrash bo‘yicha amaliy tavsiyalar bildirildi. Shuningdek, O‘simliklar karantini va himoyasi agentligi mutaxassislari tomonidan g‘o‘za zararkunandalari va kasalliklariga qarshi zamonaviy kurash usullari tushuntirildi. Fitosanitar monitoringni kuchaytirish, biologik va kimyoviy himoya usullaridan samarali foydalanish bo‘yicha ko‘rsatmalar berildi. Seminar davomida biologik himoya vositalaridan foydalanish jarayoni ham amaliy tarzda namoyish etildi. Jumladan, zararkunandalarga qarshi qo‘llaniladigan ISO suyuqligini tayyorlash va undan foydalanish tartibi ishtirokchilarga ko‘rsatib berildi. Tadbir yakunida fermer va mutaxassislarga g‘o‘za parvarishini ilmiy asosda tashkil etish, dalalarda doimiy monitoring olib borish hamda agrotexnik tadbirlarni sifatli amalga oshirish bo‘yicha tegishli tavsiyalar berildi. Mazkur o‘quv-amaliy seminar paxta maydonlarining fitosanitar holatini yaxshilash, hosildorlikni oshirish va kelgusida mo‘l hamda sifatli hosil yetishtirishga xizmat qiladi.