Surxondaryo viloyati Boysun tumani hokimligi

Yoshlar bandligini ta’minlash — ustuvor yo‘nalish Bugun Boysun tumani hokimligida oliy ta’lim muassasalarini tamomlagan yoshlar hamda ularning ota-onalari ishtirokida navbatdagi uchrashuv bo‘lib o‘tdi. Uchrashuvda tuman hokimi, tuman Davlat xavfsizlik xizmati bo‘limi boshlig‘i, hokimning yoshlar siyosati masalalari bo‘yicha o‘rinbosari hamda Yoshlar ishlari agentligi tuman bo‘limi rahbari ishtirok etdilar. Tadbirning asosiy maqsadi — yoshlarning bandligini ta’minlash, ularni mehnat bozoridagi mavjud imkoniyatlardan xabardor qilish, shuningdek, o‘z yo‘nalishi bo‘yicha ish topishlariga ko‘maklashishdan iborat bo‘ldi. Uchrashuv davomida yosh mutaxassislar tomonidan ishga joylashish, ta’limda erishilgan bilimlarni amaliyotga joriy etish va davlat qo‘llab-quvvatlash mexanizmlaridan foydalanish masalalari yuzasidan bir qator taklif va murojaatlar bildirildi. Murojaatlar har bir soha bo‘yicha tegishlicha o‘rganilib, mas’ul rahbarlar tomonidan yoshlarga aniq tavsiyalar va amaliy yordam choralari belgilab berildi. Shuningdek, ularga yangi ish o‘rinlari yaratish, bo‘sh ish o‘rinlari to‘g‘risidagi ma’lumotlar bazasi bilan tanishtirish, mehnat yarmarkalari va kasbga yo‘naltirish dasturlarida faol ishtirok etish taklif etildi.