Surxondaryo viloyati Boysun tumani hokimligi

Mamlakatimiz bo‘ylab e’lon qilingan “Dolzarb 90 kun” doirasida yoshlar bilan ishlash, ularning muammolarini tinglash va bo‘sh vaqtlarini mazmunli o‘tkazish maqsadida turli uchrashuv va tadbirlar tashkil etilmoqda. Jumladan, bugun "Pasurxi" mahallasida joylashgan 5-sonli umumta’lim maktabida, "Otaliqqa" olingan mahalla yoshlari ishtirokida “Prokuror va yoshlar” nomli uchrashuv tashkil etildi. Tadbirda tuman prokuraturasi xodimi J. To‘xtoshev hamda Yoshlar ishlari tuman bo‘limi boshlig‘i F. Normamatov ishtirok etib, yoshlarga davlat tomonidan ko‘rsatilayotgan e’tibor va yaratilayotgan imkoniyatlar haqida so‘z yuritishdi. Uchrashuv davomida bitiruvchi yoshlar o‘zlarini qiziqtirgan savollar, muammolar va takliflarini bildirishdi. Mas’ullar tomonidan esa zaruriy ko‘rsatmalar va tavsiyalar berildi. Shuningdek, Yoshlar ishlari agentligi tomonidan ishlab chiqilgan "Uzchess", "Mutolaa", "Ibrat farzandlari", "Ustoz AI" va "Qizlar akademiyasi" kabi foydali ilovalar haqida targ‘ibot ishlari olib borilib, ushbu platformalarning yoshlar hayotidagi ijobiy jihatlari haqida ma’lumotlar berildi. Tadbir so‘ngida yozgi ta’til davrida mahalla va maktab yoshlarining bo‘sh vaqtlarini samarali o‘tkazishlari uchun yaratilgan shart-sharoitlar mas’ullar tomonidan o‘rganildi.