Surxondaryo viloyati Boysun tumani hokimligi

Boysun tumanidagi 6-son umumta’lim maktabida tashkil etilgan "Jasorat sinfi"da o‘quvchi yoshlar bilan "Kelajakni mardlar, tarixni g‘oliblar yaratadi" mavzusida "Jasorat darsi" o‘tkazildi. Mazkur dars yosh avlodda vatanparvarlik, jasorat, matonat va fidoyilik tuyg‘ularini mustahkamlash, ularni milliy va umuminsoniy qadriyatlar ruhida tarbiyalash, Vatan himoyachilariga bo‘lgan hurmat va e’tiborni yanada oshirish maqsadida tashkil etildi. "Jasorat darsi" davomida o‘quvchilarga jasorat, mardlik va yurtga sadoqat haqida mazmunli ma’ruzalar o‘qildi, tariximizda o‘chmas iz qoldirgan qahramonlar hayoti va jasorat yo‘li haqida atroflicha so‘z yuritildi. Shuningdek, yoshlar bilan ochiq muloqot o‘tkazilib, ularni qiziqtirgan savollarga batafsil javoblar berildi. O‘quv darsi jarayonida o‘quvchilarning faolligi alohida e’tirof etildi, ularga kelajakda o‘z oldiga yuksak maqsadlar qo‘yib, Vatan ravnaqi yo‘lida sidqidildan xizmat qilish zarurligi uqtirildi. Mazkur "Jasorat darsi" yoshlarni Vatanga muhabbat, milliy g‘urur va mas’uliyat ruhida tarbiyalashda muhim ahamiyat kasb etdi.