Surxondaryo viloyati Bandixon tumani hokimligi

Bandixon tumani hokimligi majlislar zalida tuman hokimi Abdumalik Allamuradov rahbarligida hokimlik mas’ullari, tegishli korxona va tashkilotlar rahbarlari, fermer xo‘jaliklari vakillari ishtirokida navbatdagi hokimlik soati bo‘lib o‘tdi.

Yig‘ilishda tumanning ijtimoiy-iqtisodiy rivojlanishi, qishloq xo‘jaligi sohasidagi ustuvor vazifalar hamda aholi murojaatlari bilan ishlash holati batafsil tahlil qilinib, mavjud kamchiliklar tanqidiy ruhda muhokama qilindi.

Muhokamalar davomida quyidagi dolzarb masalalarga alohida e’tibor qaratildi:
 

 G‘alladan bo‘shagan maydonlarga takroriy ekin ekish ishlarini yakunlash hamda yerlardan unumli foydalanish va ishsiz fuqarolar bandligini ta’minlash;
 G‘o‘za parvarishini agrotexnik talablar asosida o‘z vaqtida va sifatli amalga oshirish;
 Yoshlarning doimiy bandligini ta’minlash, ularni tadbirkorlik va daromadli mehnatga jalb etish;
 Mahallalarda obodonlashtirish va ko‘kalamzorlashtirish ishlarini jadallashtirish, hududlarning sanitariya holatini yaxshilash;
 Yangi investitsiya loyihalarini amalga oshirish orqali yangi ish o‘rinlarini yaratish va iqtisodiy faollikni oshirish;
 Fuqarolardan kelib tushayotgan murojaatlarni o‘z vaqtida, qonuniy va ijobiy hal etish, har bir murojaat ortida inson taqdiri turganini unutmaslik.

 Yig‘ilish yakunida har bir yo‘nalish bo‘yicha mas’ul rahbarlarga aniq topshiriqlar berilib, belgilangan vazifalarning ijrosini so‘zsiz ta’minlash, ijro intizomini kuchaytirish hamda aholi manfaatlariga xizmat qiladigan ishlarni jadallashtirish yuzasidan tegishli ko‘rsatmalar berildi.

Bandixon tumanida har bir amalga oshirilayotgan islohot, har bir belgilangan vazifa va har bir qabul qilinayotgan qaror — avvalo, xalq farovonligi va fuqarolar manfaatini ta’minlashga qaratilgan.