Hakamlik sudlari faoliyati va budjet intizomiga oid qonunchilik takomillashtirildi
2026-06-25 08:30:00 / Rahbariyatning bayonotlari va nutqlari
2026 yil 21 aprelda qabul qilingan O‘RQ–1141-sonli Qonun bilan hakamlik sudlari faoliyatini yanada takomillashtirish hamda byudjet intizomini kuchaytirishga qaratilgan muhim o‘zgartish va qo‘shimchalar kiritildi. Qonun 2026 yil 24 iyuldan kuchga kiradi.
Mazkur qonunning eng muhim yangiliklaridan biri – davlat organlari, tashkilotlari va muassasalari, davlat ishtirokidagi korxonalar hamda fuqarolarning o‘zini o‘zi boshqarish organlari hakamlik bitimi taraflari bo‘lishi mumkin emasligi belgilab qo‘yildi. Shuningdek, ular tomonidan hakamlik sudlarini tashkil etish taqiqlandi.
Qonunga muvofiq, yer bilan bog‘liq nizolar, binolar va inshootlarga egalik huquqini belgilash bilan bog‘liq ishlar, shuningdek byudjet mablag‘larini undirishga oid nizolar endi hakamlik sudlari tomonidan ko‘rib chiqilmaydi.
Yana bir muhim o‘zgarish sifatida hakamlik sudyalarining malakasiga qo‘yiladigan talablar kuchaytirildi. Endi hakamlik sudyalari Adliya vazirligi tasdiqlaydigan maxsus o‘quv dasturi asosida tayyorgarlikdan o‘tishi va o‘z malakasini muntazam oshirib borishi shart.
Shu bilan birga, Ma’muriy javobgarlik to‘g‘risidagi kodeksga yangi 175⁹-modda kiritilib, hakamlik sudlari to‘g‘risidagi qonunchilikni buzganlik uchun ma’muriy javobgarlik belgilandi. Noqonuniy hakamlik sudlarini tashkil etish, davlat tashkilotlarining hakamlik bitimi taraflari sifatida ishtirok etishi yoki qonunga xilof ravishda hakamlik qarorlarini ijro etishi uchun mansabdor shaxslarga jarima qo‘llaniladi.
Ushbu o‘zgarishlar hakamlik sudlari faoliyatining shaffofligi va qonuniyligini ta’minlash, malakali hakamlik sudyalari korpusini shakllantirish hamda davlat byudjeti mablag‘laridan samarali foydalanishga xizmat qiladi.
Jinoyat ishlari bo‘yicha Bandixon tuman sudining tergov sudyasi M.Abdimo‘minov