Surxondaryo viloyati Bandixon tumani hokimligi

Bandixon tumanida ta’lim sohasini rivojlantirish, yoshlar uchun munosib sharoit yaratish borasidagi ishlar izchil davom etmoqda. Xususan, Qaldirg‘och mahallasida yana bir muhim ijtimoiy loyiha — zamonaviy maktab binosi qurilishi jadal olib borilmoqda.

Bugungi kunda yurtimizda, ayniqsa olis hududlarda ta’lim sifatini oshirish, o‘quvchilarni zamonaviy va qulay sharoitlarda o‘qitish davlat siyosatining ustuvor yo‘nalishlaridan biriga aylangan. Shu e’tibor natijasida maktablar yangilanib, yangi ta’lim maskanlari barpo etilmoqda.

Qaldirg‘och mahallasida joylashgan 19-sonli umumta’lim maktabi hozirga qadar ikki alohida binoda faoliyat yuritib kelgan. Ushbu binolar 1982 va 2008-yillarda qurilgan bo‘lib, o‘quvchilar ikki smenada ta’lim olib kelishadi.

Endilikda mazkur muammo bosqichma-bosqich bartaraf etilmoqda. Umumiy qiymati 2,7 milliard so‘mlik loyiha asosida 180 o‘rinli yangi, zamonaviy o‘quv binosi qurilmoqda. Ushbu yangi maktab nafaqat o‘quvchilar sonini qamrab olish imkoniyatini kengaytiradi, balki ularning bilim olishi uchun yanada qulay, yorug‘ va zamonaviy muhit yaratadi.

 Yangi maktab — bu shunchaki bino emas, balki kelajak avlodning mustahkam poydevoridir!

Bandixonda bunyodkorlik ishlari davom etmoqda — farzandlarimiz uchun yanada yaxshi sharoitlar yaratilmoqda.

Bandixon tumani hokimligi 
Axborot xizmati