Bandixonda qishloq xo‘jaligi sohasida samaradorlikni oshirish, hosildorlikni ko‘paytirish hamda kelgusi mavsumga puxta tayyorgarlik ko‘rish borasidagi ishlar holati o'rganildi
2026-04-18 14:00:00 / Yangiliklar
Surxondaryo viloyatida agrar sohani barqaror rivojlantirish, yer maydonlaridan oqilona foydalanish va zamonaviy agrotexnologiyalarni keng joriy etish bugungi kunning ustuvor vazifalaridan biri bo‘lib qolmoqda. Shu maqsadda hududlarda amalga oshirilayotgan ishlar tizimli ravishda o‘rganilib, amaliy choralar ko‘rilmoqda.
Shu jarayonlar doirasida viloyat hokimi Ulug‘bek Qosimov Bandixon tumaniga tashrif buyurib, qishloq xo‘jaligi sohasida amalga oshirilayotgan ishlar bilan yaqindan tanishdi. Tashrif tumandagi “Omad” fermer xo‘jaligi dalasida tashkil etilib, unda soha mutaxassislari, fermerlar va mas’ul rahbarlar ishtirok etdi.
Uchrashuv davomida 2026-yil hosiliga mustahkam zamin yaratish masalalari atroflicha muhokama qilindi. Xususan, Shinjon usulida ekilgan maydonlarda chigitning sifatli unib chiqishini ta’minlash, tomchilatib sug‘orish texnologiyalaridan samarali foydalanish va ularning samaradorligini oshirish bo‘yicha aniq vazifalar belgilab berildi.
Bundan tashqari, dala chetlariga “invitro” usulida yetishtirilgan ko‘chatlarni ekish, loviya va mosh kabi dukkakli ekinlar maydonini kengaytirish orqali yer unumdorligini oshirish masalalari ham e’tibor markazida bo‘ldi.
Uchrashuvda g‘alla maydonlariga qo‘shimcha mineral o‘g‘itlar berish, sug‘orish ishlarini tizimli yo‘lga qo‘yish, zararkunanda va kasalliklarga qarshi samarali kurashish, shuningdek, chigit ekilgan maydonlarda birinchi kompleks ishlov berish ishlarini o‘z vaqtida amalga oshirish muhim vazifalar sifatida belgilandi.
Shu bilan birga, mavjud g‘alla o‘rish kombaynlarini mavsumga shay holatga keltirish, yangi texnikalarni xarid qilish, paxta terish mashinalari parkini kengaytirish, pilla yetishtirishni rivojlantirish hamda pillaxonalarda zarur sharoitlarni yaratish yuzasidan mas’ullarga aniq topshiriqlar berildi.
Bunday amaliy yondashuvlar va joylarda olib borilayotgan tizimli ishlar Bandixon tumanida qishloq xo‘jaligi samaradorligini oshirish, yuqori hosil olish hamda aholi farovonligini yuksaltirishga xizmat qilishi bilan ahamiyatlidir.
Ma'lumot uchun: "Omad" fermer xo'jaligi dalasida "Shinjon" usulida tomchilatib sug'orish texnologiyasi asosida 12 gektar chigit ekilgan. 10 gektar g'alla maydonida yomg'irlatib sug'orish texnologiyasi joriy qilingan. Chorva mollari, parrandachilik, asalarichilik va o'rdakchilik tashkil etilgan.